Ямар нэг юмны сайн муу, бүтэх эсэхийг урьдаас мэдэх сэрэл, зөн: ёр орох (ямар нэг хэргийн сайн муу дэлгэрэнгүй...болохын бэлгэ тэмдэг урьдаас мэдрэгдэх), муу ёр (муу зөн) - Хятадын ёсонд шаазан хагарах маш муу ёр гэдэг ээ. Д. Намдаг. Цаг төрийн үймээн., сайн ёр (бэлгэ дэмбэрэл) - Үе үе баруун зовхи татахад сайн ёр ч болов уу гэж бэлэгшээх юм. Т. Султаан. Сүмбэр уулс., ёрын үг (сэжиг хүрэм үг) - Муу ёрын үг цухуйлгасан шүү. Л. Түдэв. Нүүдэл суудал., ёрын дуу (муу муухайг зөгнөсөн дуу), ёрын амьтан (сэжиглэж аймаар амьтан, бузрын амьтан) - Аюур гэж нэг ёрын амьтан улс айлыг үймүүлээд байх шиг байна. П. Хорлоо. Багш., ёрын өвчин (амархан халдаж тусдаг, хүрвэл мөд эдгэрдэггүй, нэн зовуурьтай өвчин) - Ёрын муухай өвчин байсан. “Цог” сэтгүүл., ёрын хүн (жигшин зэвүүцмээр, өөдгүй муу хүн) - Нэгд, Өнөболд хатан тогтоодоггүй, муу ёрын хүн, хоёрт, Хасарынхан омгорхог, бардам зантай, Өнөболд эр чадалтай боловч ухаан төдий л их биш бололтой нь түүнд ажиглагдсан ажээ. Ш. Нацагдорж. Мандхай цэцэн., бэлгэ ёр [хоршоо] (ёр тэмдэг), ёр бэлгэ [хоршоо] (зөн бэлгэ, далд сэрэхүй) - Үүний ёр бэлгэ нь юун. В.Инжаннаши. Хөх судар., ёс мэдэхгүй хүнд ёр халдахгүй [зүйр цэцэн үг] (муу юмнаас сэжиглэхгүй бол муу үр нөлөө нь тусахгүй гэсэн санаа).