1. Огторгуйн алсад гэрэлтэн харагдах тэнгэрийн эрхэс: од түгэх~од гийх (харанхуй болж одны харагдах дэлгэрэнгүй...хэмжээ үлэмжхэн нэмэгдэх) - Гутал бүсээ тайлан, од түгсэн говийн агуу хүнхэр тэнгэрийг ширтэн хэвтэв. С.Эрдэнэ. Миний эх орон-миний тоонот., од анивчих~од жирвэлзэх (одны гэрэл хөдлөн гялалзаж харагдах), од сийрэх (үүр цайж, огторгуйд түгсэн одны зарим нь үзэгдэхгүй болж цөөрөх), од харвах~од унах~од зарах (сансрын биет агаар мандалд гэрэл цацруулан их хурдтайгаар унах), ашдын од (биеэсээ илч гэрэл гаргадаг нар, хэдрэг зэрэг одон ертөнц), хувилдаг од (гэрэлтэхдээ өнгө нь хувирч харагдах ашдын од), хүн од (тэнгэрийн оёдлын ойр орших нэгэн сүрэг таван од), өдрийн од (а. Өдрийн цагт харагдах од; б. [шилжсэн] Маш ховор чухал зүйл) - Манай энүүгээр ирэх нь өдрийн од шиг гэж ярилаа. Ц.Дамдинсүрэн. Түүвэр зохиол., од гараг [хоршоо] (тэнгэрийн томоохон эрхэс) - Одон гараг хэмээгч цөм тогтсон үүрд байх хэрэг. В.Инжаннаши. Хөх судар., од мичид [хоршоо] (огторгуйд цэг мэт гэрэлтэн үзэгдэх тэнгэрийн эрхэс), одон орон (огторгуйн хязгааргүйд орших тэнгэрийн эрхсүүдийн цогц), одон мандал (тэнгэрийн ажиглалт, гараг ертөнцийн байршил, хэмжээ, хөгжил, эрхэс хөдөлгөөнийг цогцоор нь судалдаг ухаан), одон орны дуран авай (од гарагийг шинжлэн үзэхэд хэрэглэхээр тусгайлан үйлдсэн дуран) - Одон орны дурангийн өндрийн оройгоос түрнэ. Б.Жамц. Сэтгэлийн нууц., одны гэр (одны орших газар), од нягт (од маш, үлэмж их), долоон од (долоон бурхан од) - Түүнээс хойш би долоон бурхныг манай ээжийн од гэж ухаарсан ч юм уу, тэр долоон од сэтгэлд нэг л ойр дотно санагдах болсон байв. Д.Нямаа. Тэмээний нутаг., одон орон судлал (одон орныг судлах шинжлэх ухаан), одон орон судлаач (одон орныг судлан шинжлэхэд мэргэшсэн мэргэжилтэн), одон орныг судлах оргил (тэнгэрийн байдал, нар, сар, од гарагийг байнга шинжлэн судлахад зориулан байгуулсан багаж хэрэгсэл бүхий тусгай газар), од олон бол тэнгэр цэлмэг, хүн олон бол оюун дэлгэр [зүйр цэцэн үг] (од олон харагдаж байвал тэнгэр цэлмэг байх, олон хүнээс цэцэн ухаан гарах гэсэн санаа), од олон боловч сар мэт тунгалаг нь ховор, сар тунгалаг боловч нар мэт гэгээн бус [зүйр цэцэн үг] (сайнаас илүү сайн байдаг гэсэн санаа);