1. Утга агуулга, учир шалтгааныг дэлгэрүүлэн тайлж хэлсэн ба бичсэн зүйл - Үлгэр өгүүлэл гэгч юу болох тухай маш дэлгэрэнгүй...товчхон тайлбарыг өгүүлнэ. С.Буяннэмэх. Түүвэр зохиол., тайлбар бичих (тухайн зүйлийг учрыг тайлан бичих), тайлбар толь бичиг (үгийн утгыг дэлгэрүүлэн тайлбарласан толь бичиг), тайлбар сэлт (ном бичиг зохиолын тайлбар болон бусад зүйл), тайлбар хавсаргах (нэмэн дэлгэрүүлсэн зүйл тусад нь хавсаргах), тайлбар хийх (тухайн зүйлийг илүү тодорхой ойлгомжтой болгох үүднээс нэмэн дэлгэрүүлж тайлбарлах) - Тайлбар хийвэл зохих байсан. В.Инжаннаши. Нэг давхар асар., зургийн тайлбар (зургийг хаана, хэзээ, хэнтэй, яагаад авхуулах болсон тухай үзэгчдэд нэмэлт мэдээлэл өгөх зорилгоор хийсэн тайлбар), үгийн тайлбар (утга нь бүрхэг үгийн утгыг тайлсан тайлбар), зүүлт тайлбар [хоршоо] (тухайн зүйлийн талаарх нэмэлт мэдээлэл, ишлэн авсан ном зохиолын нэр зэргийг доор нь хадсан болон ард нь хавсаргаж өгсөн тайлбар), тайлбар нэмэлт [хоршоо] (ямар нэгэн зүйлийг нэмж тайлбарлан нөхвөрлөсөн нь);