1. Юмыг уях, торгох, даруулах зориулалттай уяа, бүч - Модон хуйт буунд шар хадган оосор хийж, ширэн дайзтай сумыг дэлгэрэнгүй...нь бүслэн дуранг нь хамт зүүжээ. Ц. Уламбаяр. Зовлон жаргал., ваадангийн оосор (юм боож орооход зориулсан дөрвөлжин бөс даавууны уяа, бүч), өрхний оосор (өрх тогтоох зориулалт бүхий уяа), чагтага оосор (монгол гэрийн тоононы голоос уях урт уяа), цагны оосор (цаг тогтоох уяа), мяндсан оосор (мяндсаар хийсэн уяа), оосор бүслүүр (гэрийн араг модыг хэлхэж, бүрээсийг тогтоон даруулж, гогцоолдон татаж, уясан дээсэн татлага), оосор уях (бүч уяаг зангидах), оосор тайлах (бүч уяа зэргийн зангилааг гаргах), оосор бүч [хоршоо] (юмны уяа, бүч, чимэг болгон хэрэглэх зүйлийн ерөнхий нэр), оосор бүчгүй орд цагаан өргөө [үлгэр] (том цагаан гэр), *оосоргүй орчлон (учир шалтгааныг нь олоход бэрх зүйл), олом муутай эмээл хөлбөрөхдөө хялбар, оосор муутай суулга тасрахдаа хялбар [зүйр цэцэн үг] (эмээлийн олом муу бол тогтвор муутай, сав суулганы уяа бүч муу бол амархан тасардаг гэсэн санаа), оосор урт, олбог зузаан [зүйр цэцэн үг] (а. Эрх мэдэл ихтэй, нөлөө бүхий хүн; б. [шилжсэн] Урт насалж, сайхан амьдрахыг бэлгэдсэн нь) -  Чиний заяагаар учирсан нөхөр чинь оосор урт, олбог зузаан болоод зургаан зүйлийн хамаг амьтанд өглөг өгөн… байв. Гучин хоёр модон хүний үлгэр;