1. Эрдэм мэдлэг олгох, зааж өгөх: ажилд сургах (ажил хийлгэх, ажил яаж хийдгийг зааж өгөх) - дэлгэрэнгүй...Ажилд сургахгүй бол айлын бүрхээр сахиж дэмий тэнэж бидний долоон булчирхайг тоочоод байх болно. С.Удвал. Их хувь заяа., амьдралд сургах (амьдралын туршлагатай болгох, амьдралын зах зухаас мэдрүүлэх) - Тогоо Магсаржавыг харц ардын амьдралд сургаж өгсөн боловч Магсаржав Тогоод байлдах дайтахаас өөр эрдэм сургасангүй өдий хүрчээ. С.Удвал. Их хувь заяа., анд сургах (ан хийхийг зааж өгөх) - Өвөө намайг анд сургах гэж хамаг цагаа алдсан байх. Б.Догмид. Цэнхэрлэн харагдана., бичиг үсэгт сургах (бичиг үсэгтэй болгох), ном сургах (сургууль явуулах, эрдэм мэдлэгтэй болгох), хөдөлмөрт сургах (хөдөлмөр хийлгэх), эрдэмд сургах (төрөл бүрийн ажил мэргэжил, хичээл ном заах) - Энэ оросууд чинь бидэнд эрдэм сургахдаа өөрсдөдөө ашигтай гэж нэг их санаагүй байх. Л.Түдэв. Алтан гадас чигийг заана., заах сургах [хоршоо] (тухайн зүйлийг хэрхэн, яаж хийхийг зааварлах) - Та нар залуу улсад зааж сургаж өг гэж хэлэв. С.Удвал. Их хувь заяа., ах нь сургадаг, дүү нь сонсдог [зүйр цэцэн үг] (ах захаа хүндэтгэх нь зүйтэй гэсэн санаа);
2. Хүний буруутай үйл явдлыг зааж хэлж өгөх -
дэлгэрэнгүй...Эхнэр дээл өмсгөхөд тэссэнгүй эхэр татан уйлж гарахад хүүхнүүд “хүний эхнэр болж байгаа хүн ингэдэггүй юм” гэж сургажээ. С.Эрдэнэ. Өгүүллэгүүд., муу зан сургах (элдэв гаж муу зуршилтай болох), сурган хэлэх (алдаа оноог нь ялган зааж хэлэх), зэмлэн сургах (алдаа эндэгдлийг нь буруушаан тодорхой хэлж өгөх) - Гэтэл эцгийн нь дуу улам чангарч, эрс шийдэмгий болж асууж байгаа биш бүр зэмлэн сургаж эхэллээ. “Цог” сэтгүүл., сурахад бүү алжаа, сургахад бүү халир [зүйр цэцэн үг] (сурч байгаа, сургаж байгаа хоёр аль аль нь шантрахгүй бол заавал амжилтад хүрнэ гэсэн санаа);
3. Эмнэг морь малыг унах, хөллөх, ачих зэрэг эдэлгээнд дасгаж номхруулах -
дэлгэрэнгүй... Адууг манах, маллах, эмнэг догшиныг сургах зэргээр уналга олж унадаг байв. Ж.Дамдин. Миний монгол., даага сургах (даагыг унаа эдэлгээнд дасгаж номхруулах ) - Чи даага сургаад л, би чамайг ажил элдэвт сургаад л байж дээ. С.Удвал. Их хувь заяа., морь тэргэнд сургах (морь тэргэнд хөллөхөд дасгах), уналгад сургах (уналга ачлаганд дасгах, номхон болгох) - Морь тэмээг хавар хүч тарга нь нимгэн цагт уналгад сургахад хялбар байдаг. Ж.Самбуу. Мал маллагааны арга туршлага., харцага сургах (харцагыг хүний эрхшээлд оруулах, ан хийж чаддаг болгох), эмнэг сургах (ороо догшин морийг номхон болгож уналга ачлаганд хэрэглэх), нохойгоо анд сургах (нохойд ан барих чадвар суулгах).
