Ургамал идэшт, том биетэй, туурайтан зэрлэг амьтны ерөнхий нэр: гөрөөс агнах (гөрөөс авлах), дэлгэрэнгүй...бор гөрөөс (Бугынхан овогт, ойт хээр, гол мөрний бургас шугуйгаар амьдардаг, өвсөн тэжээлт, салаа туруут хөхтөн) - Нинагийн дэргэдээс боссон бор гөрөөсүүд үргэн гүйх нь сарны гэрэлд тодхон харагдана. Б. Ширэндэв. Хоёр дахь учрал., бух гөрөөс (нэгэн зүйл том зэрлэг үхэр) - Тэгээд хоёр хөлтөн бид аргатай болж, арслан, заан, хирис, бух гөрөөс ч хүний арганд орж, уруулы маань өөхөөрөө тостдог боллоо. Б. Ринчен. Бух гөрөөс., лам гөрөөс (тэмээнийхэн овгийн салаа туруут амьтан; тэмээн гөрөөс), майраг гөрөөс (эвэргүй гөрөөс), нарийн гөрөөс (бор гөрөөс, зээр мэтийн жижиг гөрөөс), тураг гөрөөс (буга, хандгай зэрэг том гөрөөс), тэмээн гөрөөс (хавтгай, зэрлэг тэмээ), үхэр гөрөөс (зэрлэг үхэр) - Модон дор хэвтсэн үхэр гөрөөс тэр айсуй буй араатныг хараахан мэдээгүй тул санаа амар сэвсээ хивж хэвтнэм бөгөөд үнээ тугал бэлчих нь бэлчиж, хэвтэх нь хэвтэж байв. Б. Ринчен. Заан Залуудай., хүн гөрөөс (а. Домгийн амьтан; б. Баавгай), хүн хар гөрөөс (алмас) - Тэр ч байтугай Итгэлт тэр говьд алмас гэдэг хүн хар гөрөөс байдаг юм гэнэлээ гэж, үүнээ нотлон сонин домог өгүүлнэ. С. Дашдооров. Улаан гэрийн Юндэн., ямаан гөрөөс (янгир ямаа); ан гөрөөс [хоршоо] (алж агнах зэрлэг амьтан) - Хайрхан уулын ан гөрөөс нь хүнээс айдаггүй, хөөрхөн цоохор янзаганууд нь хүний хэлээр ярьж, лусын дагина, хүү хоёрт эрхлэн тоглож байдаг гэнээ гэв. Д. Намсрай. Лусын охинтой зохиосон үлгэрийн төгсгөл., араатан гөрөөс [хоршоо] (зэрлэг араатан амьтан) - Тэр хүмүүс хөхөө өвлийн хүйтнээр хөвч хангайн шилд араатан гөрөөс агнадаг зоримог улс билээ. Ж.Дамдин. Үймээний жил., зээр гөрөөс [хоршоо] (тугалмайт овгийн туурт төрөлд багтах сүүгээр бойжигч амьтад) - Хээрийн түймрийг гарахад түймрийн галаас зугтаасаар байгаад зээр гөрөөс цуцаж, шатаж үхдэг гэж өвгөд ярьдаг сан. Ц. Дамдинсүрэн. Хув зусаг., гөрөөс ядарвал уулаа, хүн ядарвал төрлөө [зүйр цэцэн үг] (хүн зовж тэвдэх буюу доройтон буурах үедээ ураг саднаа түшдэг гэсэн санаа).
