БӨӨС
(амьтан)
1. Хүн, амьтны цусыг сорж амьдрах далавчгүй жижиг шавж: бөөсний өвчин (бөөсөөр дамжин халдварлах дэлгэрэнгүй...өвчин), бөөсний хижиг (бөөсөөр дамжих хижиг өвчин), нохой бөөс [амьтан] (цус сорж амьдардаг, дэвхэрч үсчдэг жижигхэн шимэгч шавж), бөөсөн төдий (өчүүхэн) - Бурхан Халдунаа бөөсний төдий амиа бөөцийлөв. Лувсанданзан. Алтан товч., бөөс хуурс [хоршоо] (хүн, амьтныг шимэгчлэн амьдрах шавж, түүний өндөг); *бөөсийг нь түүх (мууг нь ялгах), бөөсөн чинээ юмыг олж үзээд, тэмээн чинээ юмыг олж үзэхгүй [зүйр цэцэн үг] (а. Өчүүхэн гэм, эндлийг сүр болгон хөөцөлдөх; б. Хол хэтийн бодолгүй), бөөсөнд хутга, бөлдөгт жад [зүйр цэцэн үг] (а. Өчүүхэн юманд дэндүү сүр бадруулах; б. Тэнцвэргүй, хэлтийдсэн юм гэсэн санаа), бөөсөн эм [ургамал] (нутаг бууц дээр ургадаг, иш навчиндаа үстэй нэгэн зүйл өвс);
2. [шилжсэн] Даавууны утас бөөмнөрсөн нь.