1. Хүн амьтны халууцах, зүдрэх зэрэгт арьсны булчирхайгаас ялгаран гарах шингэн -дэлгэрэнгүй... Царай нь минчийн улайж, магнайд нь тунгалаг шингэн хөлс нэвчинэ. Б.Нямаа. Арандалынхан., хөлс батгах (хөлс цутгах), хөлс дааварлах ~ хөлс чийхрах (хөлс гарч бие нойт оргиулах), хөлс муутай (амархан хөлөрдөг, ямагт хөлөрч явдаг), хөлс сэвхийх (а. Амьтны хөлөрсөн хөлс намдаж арилах; б. Ажил хөдөлмөрт зүтгэж байгаад түр амсхийх), хөлс сэвэх (юмаар сэвж хөлсөө сэврээх), хөлс цутгах (ихэд хөлрөх), хөлс хөөх (хөлөргөх эм уулгаж, муу хөлсийг нь гаргах), хөлс цохих (хөлс сэвэх), хөлс цутгах (ихэд хөлрөх), хөлсний булчирхай (хөлс ялгаруулан шүүрүүлдэг булчирхай), хөлсний сүв (хөлсний булчирхайн арьсны гадаргуу дээрх нүх, шар үсний сүв), шороон хөлс ~ шавар хөлс (хурдны морийг хөлслөх үеийн эхний хоёроос гурван удаагийн хөлс), хөөсөн хөлс (шороон хөлсний дараах хөлс), усан хөлс (хөөсөн хөлсний дараагийн хөлс), сувдан хөлс (хурдны морины уяа сойлго тохирох үед гарах цэвэр тунгалаг буюу хамгийн сүүлийн хөлс), *хөлс чийхрах (эвгүйцэх, сандрах, тэвдэх) - “Хүрэх газар хол, аягүй бол гурван сарын аян шүү дээ” гэж бодохоос дотор агзайн хөлс чийхрах шиг болно. Д.Намдаг. Цаг төрийн үймээн., *хөлс шүүсийг шахах (а. Хүнийг мөлжин дарлах, шулах; б. Хүнийг цаг наргүй ажиллуулж тамир тэнхээг нь барах) - Хөлс шүүсийг шахаж, хөнөөж дарлаж байв. Ц.Дамдинсүрэн. Бүрэн түүвэр., *хөлс баасаа гоожуулах (а. Ихэд хөлрөх; б. [шилжсэн] Ихэд шаргуу ажиллах, зүтгэх);
2. Мөнхүү шингэн бусад юманд наалдаж нэвтэрснийг нь:
тохмын хөлс (тохомд наалдаж нэвтэрсэн шингэн).
Ижил үг