1. Дулааны хэмжээ өндөр - Гадаах халуун, гэрийн халуун, архины халуун гуравт Батын монхор хамар нь улам их дэлгэрэнгүй...хөлөрчээ. Ш.Нацагдорж. Мандхай цэцэн хатан., халуун агаарт орох (халаасан агаар бие махбодод өвөрмөц үйлчлэл үзүүлж зарим өвчнийг анагаах чанартайд үндэслэн арьс, зүрх судасны хууч, яс, үе мөчний архаг өвчинд хэрэглэдэг бие заслын хэлбэр), халуун булаг (халуун рашаан), халуун бүс (дэлхийн бөмбөрцгийн экваторын бүсэд ойр орших газар орон), халуун зэвсэг (төрөл бүрийн галт зэвсэг, буу сумны зүйл), халуун намар (намар эрт, зуны эцэс), халуун нунтаг (шатахдаа их хэмжээний дулаан ялгаруулж хүчтэй шатдаг нунтаг маягийн хөнгөн цагаан, төрөл бүрийн төмөрлөгийн хольц), халуун оргих (а. Нар ба гал зэргийн ээлт хэт халуун болох; б. Хүний бие, өвчнөөр халуун болон эчих зэргээр халуун нь хэтийдэж зовуурьтай болох), халуун орон (дэлхийн халуун бүсэд орших улс), халуун рашаан (газраас ундран гарах эрдэст халуун ус), халуун сав (цай, хоолны халууныг хэвээр хадгалах сав), халуун салхи (агаарын урсгал уулын бэл рүү доошилж бууснаас үүсэх хуурай бүгчим салхи), халуун тогоо (а. Дотор талын гол хөндийд нүүрс хийж халаан, нарийн хоол чанах төмөр тогоо; б. Ус буцалгах тогоо), халуун ус (а. Халаасан ус; б. Бие угаах халуун хүйтэн ус бүхий нийтийн үйлчилгээний газар), халуун ханз (гал түлэх зуухан ханз), халуун цөмийн урвал (хөнгөн цөмүүд нэгдэж хүнд цөм үүсгэх урвал), халуун эгэх (сарны зурхайн ёсны хорин дөрвөн улирлын нэгний нэр, нарны зурхайн ёсны наймдугаар сарын хорьдын үе, нар буцах үе), халуун эм (эмийн зүйлийн доторх амт чанар халууныг нь), аагим халуун (зуны маш халуун), бага халуун (Дорно зүгийн зурхайн ёсны жилийн хорин дөрвөн улирлын нэг, зуны нар буцах үес), зуны халуун (зуны ид халах цаг), их халуун (Дорно зүгийн зурхайн ёсны жилийн хорин дөрвөн улирлын нэгийн нэр, зуны нар буцсанаас хойших үе), халуун буцах (намрын тэргүүн улирал дундрах буюу аадар татарч, аянгын дуу цөөрөх хийгээд сэрүүсэх үе), халуун хүйтэн [хоршоо] (халуун болон хүйтэн), халуун хүйтний тонгорол (газрын гадаргаас дээшлэх агаар мандлын тодорхой давхаргад агаарын хэм буурахгүй, харин ихэсдэг үзэгдэл);