Сэцэн хан аймгийн Илдэн вангийн хошуу одоогийн Дорнод аймгийн Халх гол сумын Тамсаг Булаг хэмээх газар оршино. Анх халхын хэцүү ван хэмээх Тогтохтөрийн санаачлагаар Төр Гэрэлтийн арван есдүгээр /1839/ онд үүсгэжээ.

    Тус хийд нь нийт дөрвөн дацан, 200 гаруй ламтай байв. Цанид, Мамба, Дүйнхор, Бадам-Ёго хэмээх нэртэй дацангууд байв. Энэ хийд нь нэлээд чинээлэг, хөрөнгө бүхий байсан ба ард олны зүгээс ихээхэн хөрөнгө татварлан авч хурал номын болон сүм хийдийн асуудалд зарцуулж байв. Тухайлбал, нийт мал 13890 байсан бол тэрхүү тоо 1890 онд 46778 болж энэ 60 жилд 4 дахин өсчээ. Үүнээс гадна тус хийдийн нэлээд толгой баян хүмүүст хутагт хувилгаад нар орж байв. Хувилгаан Дашидалын хувийн сүрэг 8520, төвд Далай хамба гэгчийн сүрэг 11091 байх жишээтэй. То ван хэмээх Тогтохтөр тус хийдийн дэргэд шашны бус албан /иргэний/ шинжтэй сургууль байгуулж байв. Мөн Халх голын баруун эргийн тохой дээр нутгийн олны хамт 1859-1864 онд Жанрайсэг бурхныг хэвтээ байдлаар бүтээн залжээ. Энэ дурсгал XIX-XX зууны үеийн хэд хэдэн хилийн үймээнд сүйдсэн ч 1995-1997 онд дахин сэргээсэн юм. (С.Чулуун, Н.Маралмаа)