Түшээт хан аймгийн жонон гүний гол хүрээ нь одоогийн Булган аймгийн Бүрэгхангай сумын нутаг Бумбат хэмээх газар байна. 1730 онд буюу Манжийн хаан Найралт Төвийн наймдугаар онд бэйл Цэмчигнамжилын хошуунаас тамга олж, тусгай хошуу болж гэр хүрээ байгуулан мөн онд Мамба, Зурхай хоёр дацан салж сургуулийг үүсгэв. Тэнгэрийн Тэтгэсний \1736-1795\ онд Засаг тайж Гончигцэрэн хэдэн сүм байгуулан хувийн хүчээр харьяат сүмд II Богдыг залж гурван зүйлийн тахил, наадам өргөж сүмд “Шадубдаржаалин” нэр шагнуулан, цагаан хашаа барих, цорж нэгийг оронг байгуулах лүндэнг буулгажээ.

    Тус хийд нь нийт 6 дацан, 4 дуган, 5 жастай 150-иад ламтай багавтар хийд байв. Төр Гэрэлтийн үед Цанид дацан, Бүрэн Засагчийн үед Жүд дацанг, Бадаргуултын үед Дүйнхор, Гүнрэг хоёр сургууль номын газар байгуулжээ. Олноо өргөгдсөний хоёрдугаар \1912\ онд Очирдарь Богд эзэн хааныг Эрдэнийн сууринд залсан учир хишиг тархаах зарлигийг дагаж харьяат хийдэд “Шаддубдаржаалин” нэр, хурлын хамбад үе улиран тунгалаг цол, цорж нэгийн орон тогтоож, бага ламд хувилгаан ямба, дэмч ламд шар цоохор олбог олгогтун хэмээснийг хичээнгүйлэн дагаж шийтгүүлжээ. (С.Чулуун, Н.Маралмаа)