Түшээт хан аймгийн Дайчин бэйсийн хошуу одоогийн Дундговь аймгийн Адаацаг сумын нутаг Цахиуртай хэмээх газар оршино. Анх 1666 онд байгуулжээ. Үүний үүсэл нь Өндөр гэгээн Занабазарын ээж Ханджамцад аягачин болж явсан эгч, дүү хоёр хүүхэнтэй холбоотой. Өндөр гэгээнийг мэндлэхэд том эгчээр нь эх бариулж аваад энхрийлэн өсгөжээ. Бага хүүхний хөхнөөс гэнэт шалтгаангүйгээр байтал их сүүн асгаран гарсныг Өндөр гэгээн шимэн зооглож лагшин өрнөн боловсроод их хүүхнийг Авай ээжий, бага хүүхнийг далай ээжий хэмээн нэрийдэж Өндөр гэгээн 32 сүүдэр зооглосон. Энх Амгалангийн тавдугаар \1666\ онд өөрийн нутгаар хар торгон дээр есөн зүйлийн эрдэнэсээр зурсан Бадамлхам сахиус гайхамшигийн адистадтай нэгийг хайрлав. Далай ээжид мөн тэр мэт бүтээсэн Махагал сахиус нэгийг хайрлав. Тэр цагаас эхлэн хоёр аягачин, садан төрөл, отог хамжлагын хүмүүс нийтээр тэр хоёр сахиусыг өргөө байгуулан залж өдөр бүр жасаа хурлыг хурдаг заншил тогтжээ. Ийнхүү Өндөр гэгээний Авай ээжий, Далай ээж хоёр зориулсан хийд байжээ. (С.Чулуун, Н.Маралмаа)