Энх Зоригт хааныг нас барсны дараа дүү Элбэг нь “Нигүүлсэгч хаан” цолтойгоор хаан ширээнд суужээ. Элбэг хаан өөрийн бэрийнхээ гоо үзэсгэлэнд татагдаж, дүү Харгуцаг дүүрэн хунтайжийг хороож түүний гэргий Өлзийт хун гоо бэйжийг гэргий болгон авчээ. Гэвч Өлзийт хун гоо бэйж нөхрийнхөө өсийг авахын тулд энэ хэрэгт оролцсон Ойрадын Хуухай даюу гэгчийг Элбэг хаанд гүтгэж хилсээр хороолгов. Үүндээ гэмшсэн Элбэг хаан Хуухай даюу-гийн хүү Батула-д Ойрадын эзэн Үгэчи хашихагийн хамтаар Ойрадыг захирах эрх олгож, өөрийн охин Самур гэгчийг түүнд гэргий болгон өгчээ.

Өөрийн нь эрх мэдлийг хассан явдалд Үгэчи хашиха ихэд дургүйцэн хилэгнэж, Элбэг хааныг хороожээ. Элбэг хааны ёс бус ажиллагаа нь биеэ даахыг оролдож байсан Ойрад болон Зүүн Монголын зарим ноёдын үйл ажиллагаанд шалтаг болж, олон жил үргэлжилсэн ужиг тэмцлийн эхэн болсон юм. Элбэг хааныг ахмад хүү Гүнтөмөр нь залгамжилжээ. (Ц.Цэрэндорж)