Харгуцаг тайжийг алагдах үед түүний хатан Сэцэг бэйж 7 сартай жирэмсэн байжээ. Түүнээс төрсөн хүүд Баянмөнх гэдэг нэр өгсөн бөгөөд түүнийг нагац өвөг Ойрадын Эсэн тайш хороохыг оролдсонд эх нь түүнийг Зүүн Монгол руу зугтаалгажээ. Баянмөнх Урианхайн Хутагт шигүши (Бас Уруудын Оручи шигүши гэдэг) гэдэг ноёны гэрт өсч, нас биед хүрсний дараа түүний охин Шихиртэй гэрлэжээ. Баянмөнх 1470 онд Ордосын Бор тохойд нутаглан суугаад Мин улсыг цэргийн хүчээр сүрдүүлж байв. Мандуулыг хаан болоход Баянмөнх жонон цолтойгоор Баруун түмнийг захирах болжээ. Гэвч Мандуул хаан хутган үймүүлэгчдийн үгэнд орж Баянмөнхийг довтолжээ. Баянмөнх ялагдаж, зугтах замдаа Юншээбү аймгийнханд алагджээ. (Ц.Цэрэндорж)