Төрбайх гүүш ханыг Хөх нуурт суурьших болсноос хойш Ойрадын чуулган даргыг сонгоход санал нэгдээгүйн улмаас Эрдэнэбаатар хунтайж, Очирт сэцэн тайж нар хамтран  чуулганы эрхийг барьж байсан ба түүхэнд “хоёр тайжийн үе” хэмээн нэрийджээ.

1640 онд Очирт сэцэн тайж Тарвагатайн Улаан бураа хэмээх газар хуралдсан “Дөчин дөрвөн хоёрын ноёд”-ын их чуулганд оролцож “Их Цааз”-ыг батлалцаж байв.

1645 онд Очирт сэцэн тайж, Цоросын Эрдэнэбаатар хун тайж нар Хасагийн Янгир хаантай байлдахаар ойрад ноёдын хүчийг хамтатгахад Хошуудын Хөндлөн убаш хугацаа алдсанаас ялагдалд хүргэжээ. Очирт сэцэн тайж дүү Аблайтайгаа өмч эзэмшлээ булаалдан эвдрэлцэж түүнийг ялсанд тэр Хөндлөн убаштай нэгджээ.

1646 онд хоёр этгээд  Илийн Хар талын Хөх уснаа тулгаран байлдаж хоёр тайжийн цэрэг ялсан ч ойрадын дотоодод хагарал үүсчээ. Зая бандида тэднийг эвээр зохицуулахыг чармайж байв. Очирт сэцэн тайж Түвэдийн V Далай лам, IV Банчин-Эрдэнэ нартай  харилцаатай байсан ба 1650 онд Ойрадын 250 гаруй хүүхдийг Цаст Түвэдийн оронд шашны номд сургахаар илгээж байв. Тэрбээр Зая бандида Намхайжамцын ойрадад шашин дэлгэрүүлэх үйл ажиллагааг бүх талаар дэмжиж байв.

1665 онд Түвдэд хувилан тодорсон Намхайжамцын  хойт дүрийг Ойрад нутагт залахаар Очирт сэцэн хан тэргүүтэй  нөлөө бүхий язгууртнууд  Түвэдэд очиж удаа дараа хүсэлт гаргаж байсан ч Түвэдийн эрх баригчид  зөвшөөрсөнгүй.

1666 онд Түвдийн V Далай ламаас Очирт сэцэн тайжид “Хан” цол олгосон тэр үеэс Очирт сэцэн хан хэмээгдэх болов. 1652 оны өвөл Очирт сэцэн хан Буруд /киргиз/-ыг довтолж эрхшээлдээ оруулжээ. 1671 онд Баатар хунтайжийг залгасан Сэнгэ хунтайж хорлогдож, түүний дүү Галдан Түвдээс дуудагдан ирж Цорос аймгийг захирах болжээ. Галдан ахын хунтайж цолыг залгаж Очирт сэцэн ханы дэмжлэгээр нэр хүнд нь өсч ойрадын олон дагах болов.

1674 оны зун Очирт сэцэн хан цэрэглэн мордож, Галдан бошготод халдаагүй боловч дагаж орсон хүмүүсийг буцаан авчээ. Тэр үеэс  Галдан, Очирт сэцэн хан нарын зөрчил гүнзгийрэв.

1676 онд Галдан хунтайж, хадам өвөг Очирт сэцэн ханыг дайлж түүнийг эрхшээлдээ оруулж авснаар Зүүнгарын хаант улс байгуулагдав. 1680 онд Очирт сэцэн хан Бор талд нас барав. (С.Цолмон)