Зүүнгарын дөрвөд аймгийн харьяат баядын цорос язгууртан Бар 1753 онд 3 Цэрэн нарыг дагалдан Чин улсад дагаар оржээ. 1754 онд Чин улсын хаанд бараалхаар ирсэнд Бард засаг, тэргүүн тайжийн хэргэм хүртээж, харьяат ардаар нэг хошуу зохиож түүнд захируулав. 1755 онд их цэргийг дагалдан Зүүнгарыг дайлаар ороход дагалдан явж урьд Зүүнгарын нутагт хоцорсон түүний харьяат 56 өрх ардыг хураан авч түүнд захируулав. 1768 онд үгүй болсонд ахмад хүү Будшир нь засаг, тэргүүн зэргийн тайжийн хэргэмийг залгамжилжээ. Дөрвөд баяд нар анх дагаар ирэх үес Түй гол, Заг Байдрагаар нутаглаж байгаад Эх аралаар дамжин Эрчист буцаж нутагласан боловч дайн самууны хөлөөс дайжин буцаж Алтайг давж Ховдод ирж суужээ. 1758 онд Улаангомын газар өн шимлэг тариа тарьж болох газар тул тэднийг тийш нь нүүлгэн суулгаснаар Барын харьяат хошуу мөн нүүдэллэн ирж баядын хошуудын зүүн хойд хэсгээр байрлав. Монгол улс Манж Чин улсаас салж төрийн тусгаар тогтнолоо сэргээн тунхаглахад 1912 онд тус хошуу нь Монгол улсдаа дагаар оров. Жавзандамба хутагт Богд хаанаас тус хошууны засаг ноён Дандарт үе улиран Хурц засаг цол, улсад туслагч гүнгийн хэргэм хүртээсэн тул үүнээс хойш тус хошууг Дөрвөдийн Төгс хүлэг далай хан аймгийн Хурц засгийн хошуу хэмээн нэрийдэх болов. 1925 оны засаг захиргааны шинэчлэлээр тус хошууг шинээр байгуулсан Чандмань уулын аймгийн Баяндмандал уулын хошуунд нэгтгэжээ. 1931 оны засаг захиргааны өөрчлөлтөөр тус хошууны хуучин нутаг нь одоогийн Увс аймгийн Зүүнговь сумын нутагт багтан оржээ. (Б.Нацагдорж)

Засаг ноёдын үе залгамжлал

Дөрвөдийн хоёр гарын чуулганы газрын зураг (1907)