Зүүнгарын дөрвөд аймгийн харьяат баядын цорос язгууртан Гүншар 3 Цэрэн нарыг дагалдан харьяат ардаа аван 1753 онд Чин улсад дагаар оржээ. 1754 онд Чин улсын хаанд бараалхаар ирсэнд түүнийг засаг, тэргүүн зэргийн тайж өргөмжилж харьяат ардаар нь нэг хошуу зохиожээ. 1755 онд Зүүнгарыг дайлаар орсон цэрэгт хүчин зүтгэж одов. 1756 онд нас барсанд ахмад хүү Цэдэнд засаг, тэргүүн зэргийн тайжийн хэргэмийг залгамжлуулав. Дөрвөд, баяд нарыг Чин улсад дагаар ирэхэд анх Түйн гол, Заг Байдрагийн газар нутаглуулсан боловч Зүүнгарыг эзэлж авсны дараа тэднийг уг нутагт нь буцаахаар шийдвэрлэсэн байжээ. 1756 онд тэд нар Эх аралаар дамжин Эрчист нүүж очсон боловч дайн самууны хөлөөс дайжин буцаж Ховдоор дайран 1758 онд Улаангомын газар ирж суурьшив. Тус хошууны нутаг нь баядын хошуудын зүүн хойд хэсэгт оршиж байжээ. Монгол улс Манж Чин улсаас тусгаарлаж төрийн тусгаар тогтнолоо сэргээхэд тус хошуу нь Монгол улсдаа дагаар орсон бөгөөд Жавзандамба хутагт Богд хаанаас 1912 онд тус хошууны засаг ноён Аршид үе улиран Мэргэн засаг цол, улсад туслагч гүнгийн хэргэм олгожээ. Үүнээс хойш тус хошууг Дөрвөдийн Төгс хүлэг далай ханы аймгийн Мэргэн засгийн хошуу хэмээн нэрийдэх болов. 1925 оны засаг захиргааны шинэчлэлээр тус хошуу нь шинээр байгуулагдсан Чандмань уулын аймгийн Баянмандал уулын хошуунд багтан оржээ. 1931 оны засаг захиргааны өөрчлөлтөөр тус хошууны хуучин нутаг нь одоогийн Увс аймгийн Зүүнговь сумын нутагт багтан оржээ. (Б.Нацагдорж)

Засаг ноёдын үе залгамжлал

Дөрвөдийн хоёр гарын чуулганы газрын зураг (1907)