Зүүнгарын дөрвөд аймгийн язгууртан Сэвдэн 1753 онд гурван Цэрэн нарыг дагалдан Чин улсад дагаар оржээ. 1754 онд Чин улсын хаанд бараалхаар ирсэнд засаг, төрийн бэйл болгож харьяат ардаар нэг хошуу зохиож захируулав. Түүний харьяат ард нь баяд аймаг болно. 1755 онд Зүүнгарыг дайлаар орсон цэрэгт хүчин зүтгэж явсан бөгөөд гавьяа байгуулсан тул дэвшүүлж төрийн жүн ван өргөмжилжээ. 1756 онд нас барсанд хүү Баасанд засаг, төрийн бэйлийн хэргэмийг залгамжлуулжээ. Харьяат хошуу анх дагаж ороод Заг Байдрагийн газар сууж байгаад Эх Аралаар дамжин Эрчис нутагт буцаж суусан боловч дайны хөлөөс дайжин буцаж Ховдоор дамжин 1758 онд Улаангомын газар хүрч суужээ. Тус хошууны нутаг нь баядын хошуудын зүүн өмнө хэсэгт байрлаж Хяргас нуураар нутаглах бөгөөд Засагт хан аймгийн Сэцэн сартуулын хошуутай өмнө талаараа зах залган сууж байжээ. Монгол улс тусгаар тогтнолоо сэргээн тунхаглахад 1912 онд тус хошуу нь Жавзандамба хутагт Богд хаанд дагаар орсонд тухайн үеийн засаг ноён Самданжамцойд үе улиран Дайчин засаг цол, төрийн жүн вангийн хэргэм хүртээсэн тул үүнээс хойш Дөрвөдийн Төгс хүлэг далай ханы аймгийн Дайчин засгийн хошуу хэмээн нэрийдэв. 1925 онд засаг захиргааны шинэчлэлээр тус хошууг баядын хошуудаар байгуулсан Баянмандал уулын хошуунд нийлүүлж Чандмань уулын аймагт харьяалуулав. 1931 оны засаг захиргааны өөрчлөлтөөр тус хошууны хуучин нутаг нь одоогийн Увс аймгийн Хяргас сумын нутагт багтан оржээ. (Б.Нацагдорж)

Засаг ноёдын үе залгамжлал

Дөрвөд хоёр чуулганы газрын зураг (1907)