Адил утгатай үг | Дөрвөдийн Сайн заяатын зүүн гарын чуулганы Дөрвөд ханы хошуу, Төгс хүлэг далай ханы аймгийн Далай ханы хошуу, Чандмань уулын аймгийн Төгсбуянт уулын хошуу |
Төрөл | Хошуу |
Цаг үе | 1754-1931 он |
Хэний хаанчлалын үед | Тэнгэрийн тэтгэсэн |
Анхны засаг ноён | Засаг, дөрвөд далай хан Цэрэн |
Удам | Дөрвөдийн Далай тайшийн 4 дүгээр үеийн ач |
Харьяалал | Дөрвөдийн Сайн заяатын зүүнгарын чуулган |
Байгуулагдсан он цаг | 1754 |
Татан буугдсан он цаг | 1931 |
Манжийн үеийн нэршил (1691-1911) | Дөрвөдийн зүүн гарын Сайн заяатын чуулганы Далай ханы хошуу |
Богд хаант Монгол улсын үеийн нэршил (1911-1923) | Төгс хүлэг далай хан аймгийн Далай ханы хошуу |
1923 оноос хойш (1923-1931) | Чандмань уулын аймгийн Төгсбуянт уулын хошуу |
Анх байгуулагдах үеийн сумны тоо | 10 сум |
1918 оны хүн амын тоо | Байхгүй |
Одоогийн | Увс аймгийн Бөхмөрөн, Сагил, Түргэн, Давст, Цагааннуур сумд, Баян-Өлгий аймгийн Ногооннуур сум |
Хошууны дотор байсан сүм хийд | Төгсбуянтын хүрээ (1745) |
Сүүлчийн засаг ноён | Түмэндэлгэржав |
Зүүнгарын дөрвөд аймгийн язгууртан Цэрэн нар Зүүнгарын дотоодын самуунаас дайжин 1753 онд Чин улсад дагаар оров. 1754 онд Чин улсын хаанд бараалхаар ирсэнд засаг, чин вангийн хэргэм хүртээж харьяат ардыг нэгэн хошуу болгожээ. 1755 онд Зүүнгарыг дайлаар орсон Чин улсын цэрэгт явж Даваачийг барих хэрэгт хүчин зүтгэсэн тул хаанд бараалхаар ирэх үед хошой чин вангийн хэргэм хүртээж, Төгс хүлэг далай хан цол шагнажээ. 1758 онд нас барсанд түүний хүү Сономгомбод засаг, далай ханы цолыг залгамжлуулав. Дөрвөд нарыг Чин улсад дагаар ирэхэд Түй, Байдрагийн голд түр суулгасан бөгөөд Зүүнгарыг эзлэн авсны дараа уг нутагт нь буцаахаар төлөвлөж байжээ. Ингээд Эх аралаар дамжин Эрчист нүүн очиж суусан боловч Зүүнгарт дэгдсэн бослого, дайн самууны улмаас буцан 1757 онд Ховдод нүүн ирж, 1758 оноос Улаангомын газар нутаглан суух болов. Төгс хүлэг далай ханы хошууны нутаг нь өмнө болон баруун талдаа Алтайн урианхайтай, хойш гэр харуулын нутгаар Тагна урианхайтай, зүүн болон зүүн өмнө талаараа баяд хошуудтай зах нийлнэ. 1911 онд Монгол улс тусгаар тогтноход Дөрвөд далай хан Жавзандамба хутагт Богд хаанд дагаар оров. Сайн заяатын зүүн гарын чуулганыг Дөрвөдийн Төгс хүлэг далай ханы аймаг болгон өөрчлөв. 1925 оны засаг захиргааны өөрчлөлтөөр Дөрвөдийн хоёр аймгийг нэгтгэж Чандмань уулын аймаг болгон өөрчлөхөд хуучин Далай ханы хошууг, Баатар засгийн хошуутай нэгтгэн Төгсбуянт уулын хошуу хэмээн нэрийдэж Баянхайрхан, Баянзүрх, Баянмөрөн, Эрдэнэхайрхан, Эрдэнэ-Уул хэмээх 5 сумтай болгожээ. 1931 оны засаг захиргааны өөрчлөлтөөр тус хошууны хуучин нутаг нь одоогийн Увс аймгийн Бөхмөрөн, Сагил, Давст, Цагааннуур сумд, Баян-Өлгий аймгийн Ногооннуур сумын нутагт багтан оржээ. (Б.Нацагдорж)
Засаг ноёдын үе залгамжлал
Цэрэн |
Засаг, хошой чин ван төгс хүлэг далай хан |
1754-1758 |
Сономгомбо |
Засаг, төгс хүлэг далай хан |
1758-1769 |
Магсаржав |
Засаг, төгс хүлэг далай хан |
1769-1812 |
Цэвээнравдан |
Засаг, төгс хүлэг далай хан |
1812-1820 |
Ламжав |
Засаг, төгс хүлэг далай хан |
1820 |
Цэвээнванчиг |
Засаг, төгс хүлэг далай хан |
1821-1843 |
Мишигдорж |
Засаг, төгс хүлэг далай хан |
1843-1848 |
Сандагдорж |
Засаг, төгс хүлэг далай хан |
1848-1854 |
Лхажалравдан-сэржид |
Засаг, төгс хүлэг далай хан |
1854-1863 |
Агваанжалцан |
Засаг, төгс хүлэг далай хан |
1864-1868 |
Гомбожав |
Засаг, төгс хүлэг далай хан |
1868-1870 |
Галсаннамжил |
Засаг, төгс хүлэг далай хан |
1870-1912 |
Түмэндэлгэржав |
Засаг, төгс хүлэг далай хан |
1912-1923 |
Jang Mu jokiyaba. Namyun, Banzaraγča mongγolčilaba. Mongγol-un qosiγu nutuγ-un temdeglel (dooradu). Ündüsüten-ü keblel-ün qoriy-a. 1990
Сономдагва Ц. Монгол улсын засаг, захиргааны зохион байгуулалтын өөрчлөлт, шинэчлэл. Улаанбаатар, 1998.
Монгол улсын шастир II. Улаанбаатар, 1997.
На.Сүхбаатар. Баруун хязгаарын нийгэм-улс төрийн хөгжлийн түүхэн тойм (ХХ зууны эхэн үеэс 1930-аад он). Улаанбаатар, 2000.
Оюунжаргал О. Манж Чин улсаас монголчуудыг захирсан бодлого. (ойрадуудын жишээн дээр). Улаанбаатар, Арвинсудар. 2009. т.185-186.
Тус толийн талаарх санал хүсэлтээ
contact@mongoltoli.mn хаягаар ирүүлнэ үү.
© Монголын түүх 2016 он