Бүрэнт засагч 5 настайдаа хаан өргөмжлөгдөв. Түгээмэл элбэгт хаан, хүүдээ төр барихад нь зөвлөх Сусунь нарын хааны төрлийн 4, Муин нарын 4 сайд, бүгд 8 хүнийг нэр заасан боловч  Бүрэнт засагчийн ээж Цыши хатан Гун вангийн тусламжтай төрийн эргэлт хийж их хатан Цыань-ий хамт хүүгийнхээ нэрийн өмнөөс төр барьжээ.  

Манж Чин улсад удаа дараа бослого хөдөлгөөн дэгдэж, мөн хар тамхины дайн хоёр ч удаа гарсан нь улс орны эдийн засгийг бүхэлд нь хүнд байдалд оруулжээ. Тиймээс Англи, Франц, Хаант Орос зэрэг орнуудтай хэлэлцээр хийж алдагдалтай ч зарим тохиролцоонд хүрчээ. Франц улстай гэрээ хийж Вьетнамд нөлөөгөө тогтоохыг зөвшөөрчээ.

1861 онд Манж Чин улс Приморийн хязгаарыг Хаант Орост шилжүүлэн өгсөн ба тэр үеэс  Владивостокийн усан боомт байгуулагджээ.

1862 оны Орос, Чин улсын гэрээгээр, Орос улсын худалдаачид Монгол газар гаальгүйгээр худалдаалах эрх олж авсан нь Орос улсын худалдаа хурдацтай нэвтрэхэд нөлөөлжээ. Энэ бүх гэрээ хэлэлцээрийг хааны нэрийн өмнөөс Цыши хатан хийжээ.

1872 онд Бүрэнт засагч хаанд Шулуун хөх хошууны аруд овогт Буяныг их хатан болгов. Өөр дөрвөн хатан авсан боловч үр хүүхэдгүй.

1873 оноос Бүрэнт засагч хаан бие даан төр барих болж 1874 онд улсын сан хэцүү байхад зуны ордныг засварлана хэмээн Гун ван, Чунь ван зэрэг авга нартайгаа маргалдав.

1875 онд халдварт өвчнөөр 19 насандаа таалал төгсчээ. Бүрэнт засагч хааны жирэмсэн байсан  Буян хатан  удалгүй  нас барсан учир угсаа залгах хүүхэдгүй. (С.Цолмон)