Тус хошууны анхны засаг ноён Ядамжав нь элжигэний Гүнзэн хатан баатарын ахмад хүү бөгөөд түүний хошууны туслагч тайж байжээ. 1726 онд урианхайг тохинуулахад хүчин зүтгэсэн тул хотогойдын жанжин бэйл Бүүвэй түүнийг тусгай хошуу захируулан засаг болгоё хэмээн айлтгасанд зөвшөөрч Ядамжавыг засаг, тэргүүн зэргийн тайж өргөмжлөв. 1742 онд нас барсанд түүний хүү Гэндэнд засаг, тэргүүн зэргийн тайжийн хэргэмийг залгамжлуулав. 1758 онд нас барсанд хүү Цэрэвдоржид засгийн тушаалыг залгамжлуулжээ. Энэ хоёр засаг ноён цэргийн хэрэгт ихээхэн зүтгэн явав. Тус хошуу нь элжигэний нөгөө нэг хошуу болох Чин ачит засгийн хошууны хамтаар Идэр чулуутын газраас нүүн яваас Ханхөхий уулын газар ирж нутаглажээ. Хойд талдаа гэр харуулын нутаг, зүүн талдаа Эрдэнэ дүүрэгч засгийн хошуу, өмнө талдаа Сартуул сэцэн засгийн хошуу, баруун талдаа Чин ачит засгийн хошуутай зах нийлнэ. Ардын дунд тус аймгийн Чин ачит засгийн хошууг их элжигэн, тус хошууг бага элжигэний хошуу хэмээн ялган хэлэлцдэг байжээ. 1911 онд Монгол улс тусгаар тогнолоо сэргээн тунхаглахад тус хошууны засаг ноён Наваанцэрэн идэвхийлэн зүтгэсэн тул Жавзандамба хутагт Богд хаанаас түүнд үе улиран Зоригт засаг цол хүртээв. Үүнээс хойш тус хошууг Засагт хан аймгийн Зоригт засгийн хошуу хэмээн нэрийдэх болжээ. 1923 оны засаг захиргааны шинэчлэлээр тус хошууг Хантайшир уулын аймгийн Зүүн Ханхөхий уулын хошуу хэмээн өөрчлөн нэрийдэж, Бадрах уулын сум хэмээх 1 сумтай болгов. 1924 онд их элжигэний Ханхөхий уулын хошуутай нэгтгэв. 1931 оны засаг захиргааны өөрчлөлтөөр тус хошууны хуучин нутаг нь одоогийн Увс аймгийн Зүүнхангай сумын нутагт багтан оржээ. (Б.Нацагдорж)

Засаг ноёдын үе залгамжлал

Зоригт засгийн хошууны газрын зураг