Халхын баруун гарын олхонуудын Убандай дармашири ноёны хүү Зодов дармашири хунтайж нь 1687 онд Түшээт хаан Чахундорж нар Засагт хаан Шар, Сайн ноёны угсааны Дэгдээхэй мэргэн ахай нарыг барьж хорооход харьяат ардыг дагуулан Шарын хүүхдүүдийг аван Галдан бошогт хаанд дагаар оджээ. 1690 онд Галдан бошогт хаан Улаанбутангийн газар Чин улсын цэрэгт дарагдсаны дараагаар Зодов нь Засагт хаан Шарын хүү Баран нарыг аван Чин улса дагаар ирсэнд засаг болгон Хөххотын газар нутаглуулжээ. 1691 онд түүнийг төрлийн дүү Эрдэнэгомбын албатыг булаав хэмээн засгийн тушаалыг эвдсэн боловч удалгүй ялыг хүлээж  хаанд бараалхаар очсонд мөн хэвээр засаг болгож, төрийн бэйл өргөмжилжээ. 1692 онд нас барсанд ахмад хүү Самудоржид засаг, төрийн бэйлийн хэргэмийг залгамжлуулав. 1696 онд нас барсанд хүү Норовбандид залгамжлуулав. Тус хошууны нутаг нь урд талдаа Сутай уулаар Дархан засгийн хошуутай, баруун талаараа захчин гүн Самбуу, албан тарианы нутаг, Мянгад хошуу, хойд талаараа Сартуул сэцэн засгийн хошуу, Баатар засгийн хошуу, зүүн талаараа Дайчин засгийн хошуутай зах нийлнэ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Гүнсэнсүрэнд үе улиран Эрдэнэ засаг цол, бэйсийн хэргэм хүртээсэн тул үүнээс хойш тус хошууг Засагт хан аймгийн Эрдэнэ засгийн хошуу буюу Эрдэнэ бэйсийн хошуу хэмээн нэрийдэх болов. 1923 оны засаг захиргааны шинэчлэлээр тус хошууг Хантайшир уулын аймгийн Сутай уулын хошуу хэмээн өөрчилж, Дарви, Хайрхан хэмээх 2 сумтай болгов. 1931 оны засаг захиргааны өөрчлөлтөөр тус хошууны хуучин нутаг нь одоогийн Ховд аймгийн Дарви сумын нутагт багтан оржээ. (Б.Нацагдорж)

Засаг ноёдын үе залгамжлал