Тус хошууны анхны засаг ноён Равдан нь халхын баруун гарын Убандай дармашир ноёны хүү Зодов дармашир хунтайжийн хүү бөгөөд анх Эрдэнэ засгийн хошуунд хавсарган захирагдаж явав. 1716 болон 1719 онд цэрэгт явж гавьяа байгуулсан бөгөөд 1727 онд эфү Цэрэн сэцэн чин ванг дагалдан Буурын гэрээг тогтооход оролцов. Эфү Цэрэн түүнийг эр сайн тул харьяат ардыг ялган тусгай нэгэн засаг болгому хэмээн айлтгасанд зөвшөөрч түүнийг засаг, тэргүүн зэргийн тайж болгон Хийрстэйн газар нутаглуулжээ. 1732 онд цэргийн тушаал эвдсэн хэрэгт хэргэмийг эвдэж цэрэгт зүтгүүлэн явуулж 1735 онд дахин уг хэргэмийг дахиулжээ. 1766 онд насжсан учир тушаалаас байлгаж ач хүү Сономдоржид засгийн тушаалыг залгамжлуулав. Тус хошууны нутаг нь өмнө талдаа Хасагт хайрхан уулын оройгоор Засагт хан аймгийн Сүжигт засгийн хошуутай, баруун талаараа Тарвагатайн нуруу, Нам даваа, Хөх хадны хар нуруу, Цагаан амны хяр, Шанд худаг, Их ам, Цагаан бугат, Бичигт нуруу, Дөчин цахир, Бор нуруу, Хүрэн бугат зэрэг газраар Баатар засгийн хошуутай,  Завхан голоор Сайн ноёны аймагтай, Яргайтын хөх бууц, Хонгорын баруун дөрөлж, Мөст нурууны хяр зэргээр Засагт ханы хошуутай зах нийлнэ. 1911 онд Монгол улс тусгаар тогтнолоо сэргээн тунхаглахад тус хошууны засаг Дамдинсүрэнд үе улиран үйзэн засаг, бэйсийн зэрэг хүртээсэн тул үүнээс хойш тус хошууг Засагт хан аймгийн Үйзэн засгийн хошуу хэмээн өөрчлөн нэрийдэв. 1923 оны засаг захиргааны шинэчлэлээр тус хошууг Хантайшир уулын аймгийн Мөнх-Өлзийдэлгэр уулын хошуу хэмээн өөрчлөн нэрийдэж, Батбуян, Жаргалант хэмээх 2 сумтай болгожээ. 1927 онд бага, жижиг хошуудыг татан буулгахад Гурвансайхан Жаргалант уулын хошуутай нэгтгэжээ. 1931 оны засаг захиргааны өөрчлөлтөөр тус хошууны хуучин нутаг нь одоогийн Говь-Алтай аймгийн Жаргалант сумын нутагт багтан оржээ. (Б.Нацагдорж)

Засаг ноёдын үе залгамжлал