Чин сүжигт номун хан хутагт Лувсанноровшарав нь Түмэнхэн сайн ноёны арван нэгдүгээр хүү Сангарза илдэн хошуучийн их хүү Дугар илдэн хошуучийн хүү Шар илдэчийн гэрт 1701 онд төржээ. Лувсанноровшарав бага наснаас Өндөр гэгээн Занабазарыг дагалдан ном эрдэмд суралцсан бөгөөд хожим Төвдөд суралцаж, Ордос газар шашны үйлсийг эрхлэн байгаад 1752 онд уг нутагтаан буцан иржээ. 1755 онд Зүүнгараас дагаар ирсэн хойдын ноён Амарсанаагийн албат ардууд оргож босохыг завдсанд Лувсанноровшарав шавдан очиж засан тохинуулж суулгажээ. 1755 онд жанжин Цэнгүнжавын айлтгаснаар Манжийн хаанаас Лувсанноровшаравт Чин сүжигт номун хан цол “Халхын Эрдэнэ ноён цоржийн харьяат шавь нарыг бүгд захирах тамга” хэмээх цутган олгуулж харьяат шавь нарыг захируулжээ. Тус шавийн нутаг нь баруун талаараа Эрдэнэ засгийн хошуу, зүүн хойт талаараа Сэцэн засгийн хошуу, зүүн болон урд талаараа Цогтой засгийн хошуутай зах нийлж Хангайн нурууны энгэрт оршиж байжээ. 1911 онд Монгол улс тусгаар тогтнолоо сэргээн тунхаглахад тус шавийг Сайн ноён хан аймагт захируулжээ. 1925 онд тус шавийг Цэцэрлэг мандлын аймгийн Баянхонгор хайрхан уулын хошуунд нэгтгэжээ. 1931 оны засаг захиргааны өөрчлөлтөөр тус шавийн хуучин нутаг нь одоогийн Баянхонгор аймгийн Галуут сумын нутагт багтан оржээ. (Б.Нацагдорж)