Тус хошууны анхны засаг ноён Цэвээндорж нь угтаа Сайн ноён Дэчинжавын хошууны тэргүүн зэрэг тайж байв. 1754 онд цэргийн хэрэглэлд тусалсан учир гүнгийн зэрэг шагнагджээ. 1759 онд Сайн ноён Дэчинжав өөрийн хошууны өссөн хүн амаар нэг сум зохиож Цэвээндоржид захируулан түүний харьяатыг тусдаа засаг хошуу болгохыг гуйсанд зөвшөөрч Цэвээндоржийг засаг, хошууны бэйс өргөмжлөв. 1773 онд ялын учир тушаалаас огцруулж хүү Сандавдоржид нь засаг тушаалыг залгамжлуулав. Тус хошууны нутаг нь зүүнш Жаргалант, өмнөш Хуримт, баруунш Зүйрэй булаг, хойш Бэлчир, зүүн хойш Сэлэнгэ мөрөн, баруун хойш Сант, зүүн өмнөш Ширэмтэй, баруун өмнөш Зүйрэй булгийн эх хүрчээ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Содномбагмиддоржид үе улиран Эрх засаг цол улсын түшээ гүнгийн хэргэм хүртээсэн тул үүнээс хойш тус хошууг Сайн ноён хан аймгийн Эрх засгийн хошуу хэмээн нэрийдэх болов. 1923 оны засаг захиргааны шинэчлэлээр тус хошууг Цэцэрлэг мандлын аймгийн Баян-Агт уулын хошуу хэмээн өөрчлөн нэрлэж, Баянхайрхан, Баянзүрх, Баянцагаанхад гэх 3 сумтай болгожээ. Жижиг хошуудыг татан буулгах бодлогын хүрээнд 1926 онд тус хошууг Цэцэрлэг мандлын аймгийн Намнан уулын хошуунд нийлүүлэв. 1931 оны засаг захиргааны өөрчлөлтөөр хуучин аймаг хошуудыг татан буулгахад тус хошууны хуучин нутаг нь одоогийн Булган аймгийн Баян-Агт сумын нутагт багтан оржээ. (Б.Нацагдорж)

Засаг ноёдын үе залгамжлал