Халхын зүүн гарын Түмэнхэн сайн ноёны ахмад хүү Зодов сэцэн ноёны угсааны Норовжавын эцэг Баму нь угтаа Халхын хойт замын баруун гарын баруун этгээдийн хойтох хошууг захирч байжээ. Тус хошууны анхны засаг Тод эрдэнэ ноёны үрчилсэн хүү дотоод сайд болж Чин улсын нийслэл Бээжин хотноо сууж байгаад Бамуг нас барсны дараагаар эцгийнхээ засгийн тушаалыг залгажлахаар ирсэн тул 1712 онд Бамугийн хүү Норовжавын засаг, тэргүүн зэргийн тайж өргөмжлөн тус хошуунаас салгаж тусдаа хошуу болгожээ. Норовжав цэргийн хэрэг зүтгэсэн тул 1736 онд улсад туслагч гүн өргөмжилжээ. Норовжав 1739 онд нас барсанд түүний ахмад хүү Дамбадоржид засаг улсад туслагч гүнгийн хэргэмийг залгамжлуулав. Тус хошууны нутаг нь зүүнш Хар ус, өмнөш Буянт гол, баруун Голын тал, хойш Буянт голын эх, зүүн хойш Бумбат, баруун хойш Баянбулаг, зүүн өмнөш Элстэй, баруун өмнөш Дэлгэр булан хүрчээ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Дугаржавт үе улиран хошууч мэргэн засаг цол хүртээсэн тул тус хошууг үүнээс хойш Сайн ноён хан аймгийн Хошууч мэргэн засгийн хошуу хэмээн нэрийдэх болов. 1923 оны засаг захиргааны өөрчлөлтөөр тус хошууг Цэцэрлэг мандлын аймгийн Отгон хайрхан уулын хошуу хэмээн өөрчилж, Баянзүрх, Биндэр, Буянт, Гол арц, Наран, Тэргүүн-Агт, Сант, Чандмань зэрэг 8 сумтай болгов. 1929 онд хуучин Засагт хан аймгаар байгуулсан Хантайшир уулын аймагт шилжүүлэн захиргав. 1931 оны засаг захиргааны шинэчлэлээр тус хошууны хуучин нутаг нь одоогийн Завхан аймгийн Улиастай, Отгон, Цагаанчулуут, Цагаанхайрхан сумдын нутагт багтан оржээ. (Б.Нацагдорж)

Засаг ноёдын үе залгамжлал