Сайн ноён Дашдэндэв 1707 онд өөрийн албат ардыг хуваан дүү Цэрэндашид өгч өөр нэг засаг хошуу байгуулахыг гуйсанд Цэрэндашийг тэргүүн зэрэг тайж өргөмжилж тусдаа засаг хошуу болгожээ. Удалгүй Цэрэндаш цэргийн хэрэглэлд тусалсан тул дэвшүүлэн улсад туслагч гүн өргөмжлөв. 1724 онд нас барсанд түүний хүү Дондовринчин засаг тушаал залгамжилжээ. Сайн ноёны аймгийг Түшээт ханаас салган байгуулахад тус хошуу шинэ аймагт шилжин захирагдав. Тус хошууны нутаг нь зүүнш Цагаан хөтөл, өмнөш Ахар уул, баруунш Өлөгтэй, хойш Өвөр хужирт, зүүн хойш Ганц мод, баруун хойш Овт гол, зүүн өмнөш Боржигид, баруун өмнөш Тэвш хүрчээ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Бат-Очирт үе улиран үйзэн засаг цол шагнаж олгосон тул үүнээс хойш Сайн ноён хан аймгийн Үйзэн засгийн хошуу хэмээн нэрлэх болжээ. 1923 онд засаг захиргааны шинэчлэлээр тус хошууг Цэцэрлэг мандлын аймгийн Арвайхээр уулын хошуу хэмээн өөрчлөн нэрийдэж, Ахар уул, Бэлтгэхбулаг, Дэлгэрэх, Мөнхгол, Өөш уул, Мазарбүрд, Төгрөг нуур, Цагаан хэдмэг гэх сумдтай болгов. 1931 онд засаг захиргааны өөрчлөлтөөр хошуудыг татан буулгаж, аймаг сумдыг зохион байгуулахад тус хошууны нутаг нь одоогийн Өвөрхангай аймгийн Тарагт, Төгрөг, Зүүн Баян-Улаан, Арвайхээр, Баянгол сумдын нутагт хуваагдан оржээ. (Б.Нацагдорж)

Засаг ноёдын үе залгамжлал