Цэвээнравдан бол Цоросын Сэнгэ хунтайжийн ахмад хөвгүүн бөгөөд түүний дүү Сономравданг Галдан бошгот хорлон алсан гэдэг. Цэвээнравдан 1690 онд Галдан бошогтоос салж, биеэ даан, Бор талд нутаглах болжээ. 1697 онд Галданг нас барсны дараа Ойрад аймгуудыг нэгтгэн захирчээ.

Цэвээнравдан 1698-1699 онд Хасагийн олон аймгийг хэдэнтээ дайлж, Эрчис мөрнөөс баруун тийшхи нутгийг эзлэн авчээ. 1715 онд Хами-г довтолж, Чин улсын цэрэгтэй тулалджээ. 1716 онд жанжин Их Цэрэндондовт цэрэг өгөн мордуулж Түвэдийн Лхас хотыг эзлүүлжээ. Цэрэндондов 1717 онд Түвэдэд халдахаар ирсэн Чин улсын цэргийг ялав. Гэвч 1720 онд Чин улсын их цэргийн түрэлтийг дийлэлгүй, Зүүнгарын цэрэг Түвэдээс гарчээ. Цэвээнравдан хаан байх хугацаандаа 1715-1720 онд Зүүнгар улсын нутагт халдан довтолсон Оросын цэргийг няцаажээ. Энэ үед Чин улс цэргээ давшуулж Зүүнгарын нутагт халдан оров. Хоёр талаасаа хавчигдсан Цэвээнравдан 1722 онд Чин улстай найрамдахаас өөр аргагүй болжээ. Цэвээнравдан 1727 онд хаан ширээний төлөө санаархагчдад хорлогдон нас баржээ. Түүний орыг ахмад хөвгүүн Галданцэрэн нь залгамжлан, Зүүнгарын хаан болов. (Ц.Цэрэндорж)