Тогтоо анхандаа Юань улсын хуантайцзийн харьяаны хишигтэн байжээ. 1335 онд Баян тухайн үеийн гол эрх мэдэлтэн Тэнгисийг хороох үед Тогтоо түүний талынхныг довтлон бутцохьжээ. 1338 онд юйшидайфу болов. 1340 онд төрийн эрхийг голчлон мэдэж байсан Баяныг хөөн зайлуулжээ. 1341 онд Төв бичгийн мужийн зүүн этгээдийн чэнсян болж, Баяны явуулж байсан бодлогыг цөмийг нь өөрчилж, орогсдын шалгалтаар дамжуулан түшмэдийг сонгодог тогтолцоог сэргээжээ. 1344 онд өвчний улмаас албан тушаалаас чөлөөлөгдсөн боловч, 1349 онд Төв бичгийн мужийн зүүн этгээдийн чэнсянгаар дахин томилогджээ.

1352 онд цэрэг авч Сюйчжоу-гийн улаан алчууртны босогчдыг даржээ. 1354 онд бослогын нэгэн толгойлогч Чжан Шичэн-г Гаою-д бүслэлтэд оруулсан хэдий ч Тогтоогийн өрсөлдөгч нар нь түүнийг гүтгэн мэдүүлсний улмаас албан тушаалаас огцорчээ. Удалгүй Тогтоо Дали руу цөллөгийн газар луу явах замдаа хорлогдож нас баржээ.

Тогтоо бол Юань улсын эцэс үеийн алдартай улс төрийн зүтгэлтэн байв. Түүнчлэн Тогтоо нь алдарт түүхч байсан агаад 1343 онд Улсын түүхийн хүрээлэнгийн ерөнхий найруулагч түшмэлээр томилогдож, Ляо, Сун, Алтан улсын түүхийг зохиох ажлыг хариуцжээ. Түүний удирдлагын доор “Цзинь ши”, “Сун ши”, “Ляо ши” гэсэн гурван төрийн түүхийг зохиожээ. (Ц.Цэрэндорж)