Н.Багабанди 1972 онд ОХУ-ын Санкт-Петербург хотын Хөргөлтийн дунд сургуулийн хөргөлтийн техник, механикчийн анги, 1979 онд Украйн улсын Одесс хотын хүнсний технологийн дээд сургуулийг инженер-технологчийн анги, 1987 онд ЗХУКН-ын Төв Хорооны дэргэдэх Нийгмийн Ухааны Академи төгсөж, гүн ухааны дэд эрдэмтний зэрэг хамгаалсан.

    Н.Багабанди МАН-ын анхан шатны байгууллагын товчооны гишүүнээснамын тэргүүн болтлоо хүчин зүтгэж, МАН-ыг шинэчлэх үйлсэд томоохон хувь нэмэр оруулсан.

    Монгол Улсын шинэ Үндсэн хуулийн (1992) дагуу УИХ байгуулахад анхны даргаар нь сонгогдож, төрийн тогтолцоо, эрх зүйн шинэчлэл хийх ажлыг гардан зохион байгуулсан. УИХ-ын даргаар ажиллах хугацаанд нь есөн удаагийн чуулганаар 369 хууль батлаж, 374 тогтоол гаргажээ. Үүний үр дүнд Монгол Улсын Үндсэн хууль, түүний хавсралт хууль болон УИХ-ын хууль тогтоох бодлогоор тодорхойлогдсон нийгмийн эрх зүйн тогтолцоог бүхэлд нь шинэчлэх зорилтыг амжилттай хэрэгжүүлэв. Нийгмийн амьдралын бүхий л хүрээний үндсэн харилцаа шинэ хуулиудаар зохицуулагдах болсон нь энэ үеийн гол ололт байв.

    Н.Багабанди Монгол Улсын төрийн тэргүүн, Ерөнхийлөгчөөр хоёр удаа сонгогдон ажиллахдаа Үндсэн хууль, Ерөнхийлөгчийн тухай хуулиар тогтоосон бүрэн эрхээ хэрэгжүүлэх, Ерөнхийлөгчийн институтыг биежин цэгцрүүлэхэд томоохон үүрэг гүйцэтгэсэн. Тэрбээр Ерөнхийлөгчөөр найман жил ажиллахдаа 42 хууль, УИХ-ын 8 тогтоол санаачилснаас УИХ 35 хууль, найман тогтоолын төслийг нь хэлэлцэн баталжээ. Мөн Монгол Улсын гадаад харилцааг хөгжүүлэхэд ихээхэн хүчин чармайлт гаргаж, НҮБ-ын Мянганы дээд хэмжээний уулзалт (2000 он), Өмнөд Африкийн Бүгд Найрамдах улсад болсон Тогтвортой хөгжлийн асуудлаар дээд хэмжээний уулзалт (2002) зэрэг олон улсын томоохон арга хэмжээнд оролцож үг хэлсэн.

    Монгол Улсын санаачилсан “Бичигтэн болох НҮБ-ын 10 жил”-ийн нээлтийн ёслол 2003 онд Нью-Йорк хотноо болсон байна. Энэ ёслолд Монгол Улсын Ерөнхийлөгч Н.Багабанди албан ёсоор уригдан оролцож, гол илтгэлийг нь тавьсан.

    Н.Багабанди 2004 онд “Даяаршлын эриний Монгол Улсын Үндэсний аюулгүй байдал, гадаад бодлогын асуудал” сэдвээр улс төрийн шинжлэх ухааны доктор (Sc.D)-ын зэрэг хамгаалсан бөгөөд Ерөнхийлөгчийн бүрэн эрхийн хугацаа дууссанаас хойш ном бясалгаж, “Титэм үг” нэртэй бодрол бясалгал, гүн ухааны хэд хэдэн боть ном гаргаад байна. (Ж.Болдбаатар)