Урианхайн 3 харуулын дотор Доянь харуул (朶顔衛) нь хамгийн хүчирхэг байсан агаад Юань улсын үеийн Доён өндөр урианхай гэгчээс гаралтай ажээ. Доянь харуул нь голдуу монголын урианхай аймгийн хүмүүсээс бүрдэж байв. Тиймээс түүгээр төлөөлүүлэн тус гурван харуулыг “Урианхайн 3 харуул” хэмээн нэрлэх болжээ.

Доянь харуулыг 1389 онд байгуулж, Торгучар гэгчийг тус харуулын чжихуйтунчжи болгожээ. Тус харуул анхандаа Тоорын голын сав нутагт нутаглаж байгаад XV зууны дунд үеэр өмнө тийш нүүдэллэн Баясгалан хадат хаалга болон Сюаньфу-гийн хооронд нутаглах болжээ.

Тус харуул Цагаан хэрмийн Баясгалан хадат хаалгаар дамжин Мин улстай харилцаж, Гуаннин-д зах нээн худалдаалдаг байжээ.(Ц.Цэрэндорж)