Гүнбилигийн эцэг Барсболд нь Монголын Баруун түмний жонон байсан агаад Боди Алаг хааныг бага байхад түүний өмнөөс хэсэг хугацаанд төрийн эрхийг барьж байв. Барсболд нас барсанд түүний ахмад хөвгүүн Гүнбилиг 1532 онд жонон болж, Баруун гурван түмнийг захирах болжээ. Түүний шууд харьяаны түмэн нь Ордос бөгөөд Шар мөрний Хэтао буюу Ордос, түүний баруун талаар нутаглаж байв.

Гүнбилиг аажмаар хүчирхэгжин өөрийн дүү Алтан, Байсгал хүндлэн нарыг удирдан ийш тийш цэрэглэн байлдаж байжээ. Улмаар хүч чадал нь улам нэмэгдэж үнэн хэрэгтээ их хааны захиргаанаас бараг гараад байв.

1524-1538 оны хооронд нийт 4 удаа Урианхан түмний эсрэг довтолж, эрхэндээ оруулжээ. 1532, 1534 онд Хөх нуурыг довтолж Ибарай, Бурхай зэрэг монгол ноёдыг ихэд ялж, тэдний албат харьяатыг эрхэндээ оруулжээ. 1533 онд цэрэг авч Датунгийн бослого гаргасан цэрэгт дэмжлэг үзүүлсэн бөгөөд тэдний ихэнх нь түүнийг дагаж Монголд оржээ. Улмаар Мин улсын Сюаньфу, Датун зэрэг газрыг удаа дараалан уулгалан дээрэмдэж, Мин улсын баруун хойт хязгаарт ноцтой аюул учруулах болжээ.

Мин улсаас худалдаа хийхийг шаардсан боловч, Мин улс татгалзсан ажээ. Гүнбилиг амьдралынхаа сүүлийн жилүүдэд цэргийн хэрэгт анхаарал хандуулахаа больжээ. Тиймээс эрх мэдэл нь дүү Алтангийн гарт оров. Гүнбилигийг нас барсны дараа хүү Ноёндара нь жонон болов. Улмаар Алтан хан хүчирхэгжихийн хамтаар Баруун гурван түмний хүч чадал сулран доройтож, яваандаа Алтан ханы захиргааг хүлээх болжээ. (Ц.Цэрэндорж)