Богд Хаант Монгол улсын үед Хаант Орос улсад суралцсан сурагчид голлосон хэсэг залуус 1921 онд Нийслэл хүрээнд хуралдаж “Бошгийг халах залуучуудын эвлэл” хэмээх залуучуудын байгууллагыг байгуулсан. “Бошгийг халах залуучуудын эвлэл”-ийн ерөнхий хорооны бүрэлдэхүүнд Г.Гүрсэд, Н.Жадамба, Бат-Очир, Х.Чойбалсан, Ж.Баваасан нар сонгогдсон. “Бошгийг халах залуучуудын эвлэл”-ийн гол үйл ажиллагаа нь нам, засгийн бодлого, шийдвэрийг олон түмэнд ухуулан сурталчлах, соёл боловсролын талаар хоцрогдсон залуучуудыг соёлжуулан гэгээрүүлэх байв. “Бошгийг халах залуучуудын эвлэл” Ардын засгийн газрын яамд болон Алтанбулаг хот, Улиастай хот, Ховдын хязгаарт үүрүүд байгуулсан. 1922 онд Москва хотноо болсон Дорно зүгийн хувьсгалт залуучуудын их хуралд МХЗЭ төлөөлөгчөө оролцуулан Коминтерний Коммунист залуучуудын интернационал болон Лениний комсомол зэрэг байгууллагуудтай холбоо тогтоосон.

    МХЗЭ-ийн анхдугаар их хурал 1922 оны 7 дугаар сард Нийслэл хүрээнд Нийслэл хүрээ, Халхын дөрвөн аймаг, Ховд, Улиастайн 30 шахам үүрүүдийн 600 гаруй төлөөлөгч оролцсон. Хурлаас МХЗЭ-ийн үндсэн зорилт, дүрмийг баталж, Төв хороог байгуулж, тэргүүлэгчид С.Буяннэмэх, Осор нарыг сонгожээ. 1922 онд МАН-ын Төв хороо, МХЗЭ-ийн Төв хороо хамтран тусгай комисс гаргаж, нам эвлэлийн хоорондын харилцааг тодорхойлохдоо “Улс орны гадаад дотоод улс төрийн бодлогыг МАН удирдан явуулах ба МХЗЭ нь энэ бодлогыг хэрэгжүүлэн биелүүлэхэд намдаа туслах үүрэгтэй" гэж заасан. 1922 оноос 1991 он хүртэл хорин удаа их хурлыг хуралдуулж, МАХН-ын зорилт шийдвэрийг хэрэгжүүлэхийн төлөө ажилласан.

    1991 онд хуралдсан МХЗЭ-ийн ХХ их хурлаар залуучууд өөрчлөл, шинэ чиг хандлагыг өрнүүлэн хэлэлцэж, МХЗЭ-ийн үйл ажиллагааг зогсоож, тус байгууллагын бааз суурь дээр залуучууд, олон нийтийн шинэ байгууллага байгуулах болсон. 1991 оны нэгдүгээр сарын 17-нд монголын залуучуудын чуулган зохион байгуулж, Залуучуудын холбоог байгуулан, холбооны тунхаглал, дүрмийг баталсан. Монголын Залуучуудын холбооны ерөнхийлөгчөөр С.Баярцогт, МЗХ-ны гүйцэтгэх хорооны тэргүүлэгч гишүүнээр Б.Баярсайхан, Г.Батхүү, Б.Баярцэнгэл, Я.Санжмятав, Ю.Эрхэмбаатар, Б.Болд, Д.Ганбат нарыг сонгожээ. (Ч.Батдорж)