Ховд аймгийн Эрдэнэбүрэн сумын нутаг Цамбагарав уулын урд энгэрийн наран ээвэр босоо том Хар хаданд энэхүү дурсгал оршино.
     Энэ хаднаа түүхийн олон үед холбогдох зураг дүрслэл нэлээд буйн дотор хурц үзүүртэй багажаар зурж сийлсэн цэрэг эрсийн зураг онц сонирхолтой. Хадны дээд хэсэгт зүүн зүг хойно хойноосоо цуварч яваа хоёр хуягт морин цэрэг, тэдгээрийн доохно талд өөдөөс нь сөрж яваа нэгэн хуягт морин цэрэг, түүний ард нумаар зэвсэглэсэн дуулгатай явган цэргийг дүрсэлжээ. Хуягт морьт цэргүүд бүгд үзүүр хэсэгт нь цацаг, унжлага маягийн зүйл унжуулсан урт жад маягийн зэвсэг барьсан байна.
     Цэрэг эрсийн заримыг өвч хуягтай, заримыг хуяггүй, өргөн мөртэй, нарийхан бэлхүүстэй, морьдыг өвч хуягтай дүрсэлсэн байна.
      Хадны доод хэсэгт дээрээс доош цувуулан хоёр хуягт морин цэргийг томоор дүрсэлжээ. Эдгээр морьт цэргүүдийн дээд талд буга, урд болон доод талд олон тооны янгир дүрсэлсэн байна. Энэ хоёр морьт цэргийг янгирын зураг дээр давхарлан зурсан нь тод мэдэгдэнэ. Тус хадны зүүн хэсэгт нэг тэмээ, түүний доод талд тэмээ унасан хүнийг бүх талбайгаар нь хонхойлон цоолборложээ.
     Дээд талын гурван морьт цэргийн хойд талд хөлөө атийлгасан нэг буга, түүний дээд талд биеийн хэлбэрийг гоёмсогоор илэрхийлсэн адуу бий.
Эдгээр хуягт морьт цэргийн зургийг олж анх нийтэлсэн М.Шинэхүү Жужаны үе буюу НТ IV-VI зуунд холбогдуулан үзсэнийг Д.Цэвээндорж, Г.Сүхбаатар нарын зэрэг судлаачид дэмждэг ба харин Оросын зарим судлаачид Түрэгийн үед хамааруулан үзэх саналтай байдаг.
     Цамбагаравын Хар хадны зургийн дүрсэлсэн арга хэлбэр, хадны зургийн өнгө, янгирын зураг дээр давхарлан морьт цэргийн зургийг зурсан зэргээс үзэхэд эндэхийн хадны зураг хүрэл, төмрийн түрүү үе болон Жужаны үед холбогдох олон үеийн дурсгалт газар болно. (Н.Батболд)