Цагаагчин гахай жилийн өвлийн тэргүүн сарын 10-нд Богд Живзундамба хутагтын нэр заан тушаасны дагуу Түшээт хан аймгийн чуулганы дарга, засаг улсын түшээ гүн Чагдаржав, Сэцэн хан аймгийн хамаарсан жанжин, засаг хошууны байс Гомбосүрэн,Сайн ноён хан аймгийн жүн вангийн зэрэг засаг төрийн бэйл Цэдэнсодном, улсад туслагч гүнгийн зэрэг, засаг тэргүүн зэрэг тайж Намсрай, да лам Цэрэнчимэд нарын зургаан хүний бүрэлдхүүнтэй байгуулагджээ. Дараа нь Түшээт хан аймгийн жанжин, засаг чин ван Ханддорж нэмэгдэн орж, долоон гишүүнтэй болсон.

    Долоон гишүүний хоёр нь буюу гүн Чагдаржав, жүн ван Гомбосүрэн нар захиран шийтгэх, бусад нь зөвлөн шийтгэх үүрэгтэй байв. Аливаа асуудлыг хоорондоо зөвлөн хэлэлцэж шийдвэрлэдэг, хэрвээ санал нэгдэн шийдвэрлэж чадахгүй бол Богдод айлтгаж, зарлигийг гуйн шийтгүүлдэг байв.

    Ерөнхийлэн Шийтгэх Газар нь  тусгаар тогтнолын төлөө тэмцлийн эхний ололтыг бататган хамгаалж, улс орноо бүрэн чөлөөлөх, Манжийн захиргааны үеийн төрийн тогтолцоо, төрийн төлөөний байгууллага, албан тушаал, албыг халж өөрчлөх, улс орны дотоод амьдралыг зохицуулах, олон монгол аймаг, хошуудыг үндэсний хувьсгалд татан оролцуулах, шинэ Монгол Улсын байнгын Засгийн газрыг байгуулах бэлтгэлийг хангаж байгуулах зэрэг олон талт үйл ажиллагаа явуулжээ. (Б.Пунсалдулам)