1921 оны 1 дүгээр сарын 18, 23-нд болсон  зөвлөгөөнөөр Түшээт хан аймгийн Эрдэнэ ван, Сумъяа бэйсийн хошууд, Хиагтын 50 цэрэг, зүүн гурван харуулаас цэрэг элсүүлэхээр тогтон Д.Сүхбаатар, Х.Чойбалсан, Д.Чагдаржав, Л.Дэмбэрэл, Н.Билэгсайхан нар уг ажлыг тэргүүлэн гүйцэтгэснээр  цэрэгт элсэгчдийн тоо 3 сарын эхээр 400-д хүрчээ. 3 сарын 10-нд цэргийг  4 хороо болгон даргад Б.Пунцаг, О.Цэрэндорж, Ц.Хасбаатар,Ч.Базарсадыг, “Суртлыг номлогч”-ийн тушаалд Х.Чойбалсан, Ц.Дамбадоржийг томилжээ. 3 дугаар сарын 12-ны өдөр Цэргийн штабыг шинэчлэн даргад Лятте, туслахад П.И.Литвинцев, Беретти, дэд жанжинд бэйс Сумъяаг томилж, цэргийг “Ардын журамт цэрэг“ хэмээн нэрлэн АТЗГ-ын мэдэлд захируулав. АЖЦ-ийн бүрэлдэхүүний тэн хагас, удирдлагын үндсэн цөмийг хуучин цэргүүд бүрдүүлж, тэдний дундах Д.Сүхбаатарын нэр хүнд,  хэлхээ холбоо  нь зэвсэгт хүч богино хугацаанд байгуулагдах үндэс болжээ. Ардын журамт цэрэгт Хиагтын 4 хорооноос гадна АТЗГ-ын шийдвэрээр Ц.Хасбаатар, Ц.Дамбадорж нарын Баруун хязгаарт байгуулсан 130-аад хүнтэй хороо; Д.Чагдаржавын Дархадад бүрдүүлсэн 300 гаруй хүнтэй 2 хороо цэрэг багтана.

       Засаг захиргааны харьяалалаар бүх Монголыг төлөөлсөн халх, буриад, цахар, дөрвөд, баяд, казак, урианхай, дархад зэрэг олон ястны төлөөлөгчдөөс бүрдсэн АЖЦ, тэдэнтэй нэгдсэн хязгаарыг сахиулах цэрэг ангиуд 1921 оны 3 сараас 12 сарын туршид  дангаар болон ЗОУ, АДБНУ-ын цэрэгтэй хамтран Монгол орны умард, төв хэсэг, баруун, зүүн хязгаарыг хятадын гамин, оросын цагаан цэргээс бүрэн чөлөөлж,  үндэсний  тусгаар байдлаа сэргээх, хил хязгаараа  батлан хамгаалж нам төрийн бодлогыг ард олонд сурталчлан дэлгэрүүлэхэд гол үүрэг гүйцэтгэжээ. Тэдний дунд цэргийн эрдэм ухаан, баатарлаг гавъяагаараа олон түмэнд алдаршсан Хатанбаатар Магсаржав, Д.Сүхбаатар, Л.Сумъяа, Л.Гомбо-Идшин, Ж.Далай, Д.Дүваа, М.Дорждэрэм, Б.Пунцаг, Э.Тогтох, Ө.Чулуун, Ц.Ядамсүрэн, М.Ярин нарын олон баатар байв.

        Ардын журамт цэргүүдэд 1931 оноос олгосон “Ардын хувьсгалын партизан” цолыг Монгол улсын харьяат 960  хүн хүртжээ. Тэдний дурдатгалыг 1961,1969  онд тус бүр нэг ботиор, 1982-1986 онд 3 ботиор эмхтгэн гаргасан. (Н.Хишигт)