1888 оны 5 дугаар сарын 16-нд төрж, 3 настайдаа хойт эцэг Ринчиноноор овоглосон. 1899-1914 онд  Дээд-Үд, Троицкосавскийн бага, дунд сургууль, гаалийн сургууль, Технологийн дээд сургуулийн бэлтгэл анги, Томскийн гимнази,  Петербургийн их сургуулийн хуулийн ангид суралцаж, оюутны нууц хөдөлгөөн оролцон улс төрийн ухуулга явуулсны учир хоригдож явсан.1915-1916 онд Монголд эдийн засгийн шинжилгээний ангид оролцсон.1917-1918 онд Буриадын үндэсний хөдөлгөөний удирдагчдын нэг, 1919 онд Нармай Монголын Засгийн газрын зөвлөх байсан.

   1920 оны зунаас  ЗОУ-д очсон Монголын эх орончдын үйл хэрэгт туслалцаж, Москвад очсон төлөөлөгчдийн орчуулагчаар ажилласан. 1921 оны 4 сараас АТЗГ-ын зөвлөх, Бүх Цэргийн зөвлөлийн гишүүнээр ажиллаж, цагаантны эсрэг тэмцэлд оролцсон. 1921 оны 7 сараас АЗГ-ын зөвлөх, БЦЗ-ийн тэргүүлэгчээр ажиллаж, МАН-ын  II, III их хурлаас Төв Хорооны гишүүн, тэргүүлэгч гишүүнээр сонгогдсон.  Э.Д.Ринчино Монгол Ардын засгийн газраас  хэрэгжүүлсэн нийгмийн өөрчлөлтийн үйл явцад идэвхийлэн зүтгэхийн зэрэгцээгээр эрх мэдлээ хэтрүүлэн Монголын төр, намын удирдагчдыг хагаралдуулах, амь насыг хорооход гол үүрэг гүйцэтгэсэн. Коминтерний төлөөлөгч Т.Рыскуловтай  зөрөлдсөний улмаас 1925 оны 11 сард ЗХУ-д эргэн татагдсан. Москвагийн Дорно дахины хөдөлмөрчдийн их сургуульд багшилсан. 1930 онд БХК (б)Н-д орлогчоор, 1933 онд жинхэнэ гишүүнээр элссэн.

    Монголын үндэсний хөдөлгөөн, нам, улсын байдал, эдийн засаг, шашны асуудлаар 20 гаруй  өгүүлэл бичсэн. ЗСБНХОУ-ын Улаан тугийн одон, БНМАУ-ын Цэргийн гавьяаны улаан тугийн одонгоор шагнагдсан

   Э.Д.Ринчиног 1937 оны 6 сард  ЗХУ-ын ДХАК-аас баривчилж, “японы тагнуул, БХК(б)Н, Зөвлөлт Засгийн удирдагчдыг хөнөөхөөр бэлтгэсэн, Буриад-Монголын ардын аж ахуйг хорлон сүйтгэх ажиллагаа явуулсан” гэж буруутган ялын дээд хэмжээгээр шийтгэж 1938 оны 6 сарын 23-нд гүйцэтгэсэн. ЗСБНХУ-ын Дээд Шүүхийн Цэргийн коллегийн 1957 оны 5 сарын 7-ны өдрийн магадлагаагаар Э.Д.Ринчиногийн хэргийг хэрэгсэхгүй болгож цагаатгасан. (Н.Хишигт)