Адил утгатай үг | Халхын дорнод замын Хэрлэн барс хотын чуулганы зүүн гарын өмнөд хошуу, Сэцэн хан аймгийн Эрхэмсэг засгийн хошуу, Хан Хэнтий уулын аймгийн Хан Чандмань уулын хошуу, Эрхэмсэг бэйсийн хошуу |
Төрөл | Хошуу |
Цаг үе | 1691-1926 он |
Хэний хаанчлалын үед | Энх-Амгалан |
Анхны засаг ноён | Засаг, улсад туслагч гүн Ханд |
Удам | Сэцэн хаан Шолойн дөрөвдүгээр хүү Бумба дархан хунтайжийн угсаа |
Харьяалал | Сэцэн хан аймаг |
Байгуулагдсан он цаг | 1691 |
Татан буугдсан он цаг | 1926 |
Манжийн үеийн нэршил (1691-1911) | Халхын дорнод замын Хэрлэн барс хотын чуулганы зүүн гарын өмнөд хошуу |
Богд хаант Монгол улсын үеийн нэршил (1911-1923) | Сэцэн хан аймгийн Эрхэмсэг засгийн хошуу |
1923 оноос хойш (1923-1931) | Хан хэнтий уулын аймгийн Хан Чандмань уулын хошуу |
Анх байгуулагдах үеийн сумны тоо | 2 сум |
1918 оны хүн амын тоо | Өрх – 228. Эрэгтэй – 408 (үүнээс тайж – 39, хамжлага ард – 76, лам банди – 163, сумны албат эр – 187, сул эр – 43). Эмэгтэй – 396. Нийт – 804. |
Одоогийн | Дорнод аймгийн Сүмбэр сум |
Хошууны дотор байсан сүм хийд | Их амгалант сүм (1805) |
Сүүлчийн засаг ноён | Мишигдорж |
Халхын Сэцэн хаан Шолойн хүү Бумба дархан хунтайжийн хүү Хонгор ахай дайчин 1688 онд зүүнгарын цэргийн хөлөөс зайлан Сэцэн хааны ноёдоос хамгийн түрүүнд Чин улсад дагаар орж, Энх-Амгалан хаанд бараалхан ирсэнд түүнийг засаг болгоод харьяат ардыг нь захируулжээ. 1690 онд зүүнгарын цэргийн довтолгооноос зайлан Хонгор ахай дайчингийн албат олон баргачууд Хянганы нурууг даван Хармөрөн мужид сарнин орсныг Чин улс хураан авч манж 8 хошуунд оруулан Мүгдэнд суулгав. 1691 оны Долнуурын чуулганаас өмнө Хонгор ахай дайчин нас барсан тул түүний засгийн тушаалыг ач дүү Хандад залгамжлуулж, улсын түшээ гүн өргөмжилжээ. 1695 онд зүүнгарын цэргийн довтолгооны үеэр албат ардаа аван Орост дагаар орсонд оросын тал Нэвчүүгийн гэрээний дагуу түүнийг буцаан өгсөнд цаазаар авав. Засаг тушаалыг нь түүний авга Цэвдэнд залгамжлуулжээ. Тус хошууны нутаг нь зүүнш Өмхий булаг, өмнөш Соёлж уул, баруунш Эрээн уул, хойш Цэцэн бүрд зүүн хойш Хэрээ хошуу, баруун хойш Шивтэр нуур, зүүн өмнөш Гурван хад, баруун өмнөш Мухар тал хүрчээ. Өмнө талдаа Шилийн голын чуулганы хоёр үзэмчин хошуутай зах нийлнэ. 1911 онд Монгол улс тусгаар тогтнолоо сэргээн тунхаглахад тус хошууны засаг ноёнд үе улиран Эрхэмсэг засаг цол шагнасан тул тус хошууг Сэцэн хан аймгийн Эрхэмсэг засгийн хошуу хэмээн нэрийдэх болов. 1923 оны засаг захиргааны шинэчлэлээр Хан Хэнтий уулын аймгийн Хан Чандмань уулын хошуу хэмээн өөрчилж, Баян-Өлзийт хэмээх нэг сумтай болгожээ. 1926 онд жижиг хошуудыг татан буулгах үеэр тус аймгийн Халх голын хошуунд нийлүүлжээ. 1931 онд хошуудыг татан буулгаж, аймаг сумдыг зохион байгуулах үеэр тус хошууны нутгаар одоогийн Дорнод аймгийн Сүмбэр сумыг зохион байгуулжээ. (Б.Нацагдорж)
Засаг ноёдын үе залгамжлал
Ханд |
Засаг, улсын түшээ гүн |
1691-1695 |
Цэвдэн |
Засаг, улсын түшээ гүн |
1695-1713 |
Туба |
Засаг, улсын түшээ гүн |
1713-1733 |
Жамцан |
Засаг, улсын түшээ гүн |
1733-1767 |
Ёндон |
Засаг, улсын түшээ гүн |
1768-1786 |
Дашгэлэг |
Засаг, улсын түшээ гүн |
1786-1821 |
Доржпалам |
Засаг, улсын түшээ гүн |
1821-1822 |
Сономдаржаа |
Засаг, улсын түшээ гүн |
1822-1844 |
Эрдэнэтогтоол |
Засаг, улсын түшээ гүн |
1844-1875 |
Жамсранжав |
Засаг, улсын түшээ гүн, бэйс |
1876-1892 |
Цэрэнням |
Засаг, бэйс |
1892-1915 |
Мишигдорж |
Засаг, бэйс |
1915-1923 |
Jang Mu jokiyaba. Namyun, Banzaraγča mongγolčilaba. Mongγol-un qosiγu nutuγ-un temdeglel (dumda). Ündüsüten-ü keblel-ün qoriy-a. 1990
Майский И. Современная Монголия. Иркутск, 1921.
Сономдагва Ц. Монгол улсын засаг, захиргааны зохион байгуулалтын өөрчлөлт, шинэчлэл. Улаанбаатар, 1998.
Шархүү Цэ. Дөрвөн аймгийн засаг хошуудын засаг ноёдын товч шастир. // Mongoru kenkyukai. Osaka, 1984. Vol.7, т.119-207.
Тус толийн талаарх санал хүсэлтээ
contact@mongoltoli.mn хаягаар ирүүлнэ үү.
© Монголын түүх 2016 он