Сэцэн хаан Шолойн ахмад хүү Мачари илдэн түшээтийн хүү Дарь 1688 онд төрлийн олноо тэргүүлэн Сэцэн хан нарыг дагалдан говийг туулан Чин улсад дагаар орсонд жонон өргөмжилжээ. 1691 онд Долнуурын чуулган дээр Дарийг засаг, хошууны бэйс өргөмжилжээ. Насжсан учир засгийн тушаалаас байлгахыг хүссэнд түүний ахмад хөвүүн Ахай Цэмбэлд засаг, хошууны бэйсийг залгамжлуулжээ. Хошууны хүн амын ихэнхийг хардал овгийнхон бүрдүүлсэн хэмээдэг учраас тус хошууг ардын дунд Хардал засгийн хошуу гэдэг байжээ. Тус хошууны нутаг нь зүүнш Цаг булаг, өмнөш Өндөр хар толгой, баруунш Нүүрстэйн ус, хойш Хөдөөн элээ уул, зүүн хойш Их арт уул, баруун хойш Эргэнэг уул, зүүн өмнөш Уушиг уул, баруун өмнөш Цагаан хөтөл хүрчээ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Доржцэрэнд үе улиран бишрэлт засаг, төрийн жүн ван хэргэм шагнасан тул Сэцэн хан аймгийн Бишрэлт засгийн хошуу хэмээн нэрлэх болжээ. 1923 оны засаг захиргааны шинэчлэлээр Хан хэнтий уулын аймгийн Галшар уулын хошуу хэмээн өөрчилж, Баяхан, Баянмөнх, Будар, Буянтбулаг, Дэлгэр уул, Ноён уул хэмээх 6 сумтай болгожээ. 1931 оны засаг захиргааны өөрчлөлтөөр хошуудыг татан буулгахад Хэнтий аймгийн Галшар, Буянт хэмээх хоёр сумыг байгуулаад сүүлд нэгтгэн одоогийг Галшар сумыг байгуулжээ. (Б.Нацагдорж)

Засаг ноёдын үе залгамжлал

Бишрэлт засгийн хошууны газрын зураг (1907)