Адил утгатай үг | Түмэн тайж, Засагт хаан |
Хамаа бүхий үг | Улс төрийн нэгдэл, Төв засаг, |
Төрөл | Түүхэн зүтгэлтэн |
Цаг үе | Дөчин дөрвөн хоёрын Монгол улс |
Хэний хаанчлалын үед | Түмэн Засагт хаан [1558-1592] |
Өөр нэр (цол, сүмийн цол, хоч нэр гэх мэт) | Засагт хаан |
Хүйс | Эр |
Төрсөн он, сар, өдөр | 1539 |
Нас барсан он, сар, өдөр | 1592 |
Овог, аймаг | Хиад боржигин |
Төрсөн газар | Цахар |
Гэр бүл (Эцэг, өвөг эцэг, эх, нагац өвөг, хадам эцэг, хүргэн, эхнэр, нөхөр, хүү охин гэх мэт) | Өвөг эцэг нь Боди-Алаг хаан, Эцэг нь Дарайсун Гүдэн хаан, Хөвгүүд Буян, Зайсанхор, Энх, Байсанхор, Зайсан, Мангуй үйзэн, Эсэ, Сонин, Дайчин, Боди, Бабан, Саарал, Сангарзай, Дүүрэн |
Чингис хааны 19 дэхь үеийн үр хойчис. Дарайсун Гүдэн хааны ахмад хөвгүүн Түмэн 1558 онд их хаан суусан. Тэрээр Их хааны нэр төрийг өргөхийн тулд зүүн, баруун түмнийг нэгтгэн захирахыг оролдож, өөрийн ураг төрлийн ноёдоос төлөөний сайд суулган,тэднээр дамжуулан Төв засгийг зарласан. Алтан ургийн залгамж,эв найрамдлыг эрхэмлэсэн Түмэн хааныг халхын баарин отгийн Субухай,Шиуха зоригт, урианхайн Тонхур, Занхан, үжээдийн Хонхдай, баруун түмний Баясхал ноён, түүний үр хөвгүүд,урианхайн харуулынхан дэмжсэнээр Монголын улс төрийн нэгдэл дахин сэргэжээ.
Түмэн хаан төрийг цааз хуулиар чангатган номын хүчээр засч ирсэн уламжлалыг даган 1576 онд Түвэдийн Гарма ламыг урьж ирүүлэн улааны шашинд орж, III Далай лам Содномжамцтай холбоо тогтоохоор хоёр удаа нутагтаа залсан.Төвдтэй шашин улс төрийн холбоо тогтоон бүс нутаг дахь байр сууриа хадгалах,Мин улсын эсэргүүцэл довтолгооныг няцаах хэрэгсэл болгож байсан нь түүний гадаад улс төрийн үйл ажиллагааны нэг чухал чиглэл байв. Түмэн хаан газар нутгаа өргөтгөх бодлого явуулж, зүрчид, илигүд, дагуур аймгуудыг эрхэндээ оруулан, алба татлага авч байв.
Түмэн хааны улс төр, шашны үйл ажиллагаа үр дүнд хүрч дотоодын самуун зогсон ард олны амьдралд эерэг өөрчлөлтүүд гарсан. Тэрээр эе эв,засаг хууль, шашин номын хүчээр нийт зүүн Монголыг нэгтгэн зангидаж Их хааны сүр нөлөөг дэлгэрүүлэн Засагт хаан цол хүртжээ.
Монголын улс төрийн төрийн эв нэгдлийг сэргээж, 35 жил төр барьсан Түмэн засагт хааныг ахмад хөвгүүн Буян нь залгамжлан хаан суужээ. (Н.Хишигт)
Тус толийн талаарх санал хүсэлтээ
contact@mongoltoli.mn хаягаар ирүүлнэ үү.
© Монголын түүх 2016 он