Тус хошуу нь анх Дайчин засгийн хошуунд багтаж байжээ. 1730 онд хошуу засаг Цэмцэгнамжилын дүү Пунцагравданг цэргийн хэрэгт хичээл зүтгэлтэй явав хэмээн хааны зарлигаар сайшаан түүний ахын харьяат 2 сумны 1-ийг түүнд хуваан өгч засаг, тэргүүн зэргийн тайж өргөмжлөөд тусдаа хошуу болгов. 1732 онд түүний ах Цэмцэгнамжил өөлдийн засаг, ван Сэвдэнванбугийн харьяат хиргис нар оргон явахад алагдсаныг сонсч даруй цэрэг аван одож тэдний олныг бүрнээ дагуулан авчээ. 1746 онд нас барсанд түүний хүү Рампилдорж залгамжилжээ. Тус хошууны нутаг нь Туул гол, Харуухын гол хоёрын уулзарт байсан бөгөөд зүүнш Шар бүрд, өмнөш Дашлүн уул, баруунш Зөөлөн даваа, хойш Нарийн муухай өндөр, зүүн хойш Дааган дэлийн дөрөлж, баруун хойш Улаан шаврын эхний өндөр, зүүн өмнөш Аргаль, баруун өмнөш Мандал хүрчээ. 1911 онд Монгол улс тусгаар тогтнолоо сэргээн тунхаглахад тус хошууны засаг ноён Ванчигравданд үе улиран жонон засаг, улсад туслагч гүнгийн хэргэм шагнаснаар тус хошууг Түшээт хан аймгийн Жонон засгийн буюу Жонон гүнгийн хошуу гэх болжээ. 1923 оны засаг захиргааны өөрчлөлтөөр Богд хан уулын аймгийн Бүрэгхангай уулын хошуу хэмээн өөрчлөн нэрийдэж, Баянхангай, Заамар, Их дулаан зэрэг сумдтай болгожээ. 1931 оны засаг захиргааны өөрчлөлтөөр хуучин хошуудыг татан буулгаж, аймаг сумдыг байгуулахад Булган аймгийн Бүрэгхангай, Баяннуур, Дашинчилэн, Төв аймгийн Заамар сумдыг байгуулжээ. (Б.Нацагдорж)

Засаг ноёдын үе залгамжлал

Жонон засгийн хошууны газрын зураг (1907)