Халхын зүүн гарын туслагч жанжин Данзандорж 1736 онд нас барахад 1738 онд түүний ач Санжайдоржид засаг тушаалыг залгамжлуулжээ. Гэвч Санжайдорж насан бага Бээжин хотноо сууж байсан тул Данзандоржийн хүү Сандагдорж түүнийг орлон хошууг захирч байсан бөгөөд Санжайдорж нас биенд хүрч 1755 онд хошуу нутагтаа хүрч иртэл захирчээ. Мөн онд түүнийг бэйс өргөмжилсөн бөгөөд 1758 онд Санжайдорж түүний авгад нэг сум салган өгч тусдаа хошуу болгож өгөхийг айлтгасанд хаанаас зөвшөөрч Сандагдоржийг засаг өргөмжлөн хошуу захируулжээ. Тус хошууны нутаг нь зүүнш Цахирын хар, өмнөш Шандал, баруунш Аргаль, хойш Аргаль, зүүн хойш Чинтолгой, баруун хойш Цагаан чулуут, зүүн өмнөш Муу билүүт, баруун өмнөш Салаа уулны нуруу хүрчээ. 1911 онд Монгол улс тусгаар тогтнолоо сэргээн тунхаглахад Түшээт хан аймгийн Үйзэн засгийн хошуу хэмээн өөрчлөн нэрийдэж тухайн үед засаг суусан Түдэвдоржид улсын түшээ гүн, үйзэн засаг цол олгожээ. 1923 оны засаг захиргааны өөрчлөлтөөр тус хошууг Богд хан уулын аймгийн Их хорго уулын хошуу хэмээн өөрчлөн нэрлэж байгаад нутаг дэвсгэр багатай тул Богд хан уулын аймгийн Хангай хайрхан уулын хошуу буюу хуучин Түшээт ханы хошуу лугаа нийлүүлжээ. Тус хошууны хамгийн сүүлийн засаг ноён Түдэвдорж нь хожим нэртэй хуурч болсон байдаг. 1931 оны засаг захиргааны шинэчлэлээр тус хошууны хуучин нутгаар Булган аймгийн Гурванбулаг сумыг байгуулжээ. (Б.Нацагдорж)

Засаг ноёдын үе залгамжлал

Үйзэн засгийн хошууны газрын зураг