Баянхонгор аймгийн Бууцагаан сумын нутагт /сумын төвөөс зүүн хойш 40 гаруй км зайтай/ баруун хойноос зүүн урагш цувран тогтсон, оройг нь тэгш тайрсан мэт сонин тогтоцтой гурван уулыг Гурван Мандал хэмээнэ. 
     Энд хадны зураг, эртний Түрэгийн руни бичээс тэргүүтэй сонирхолтой дурсгал тун ихтэй. Ялангуяа уулын оройн тэгш толигор хаднуудаар олон үеийн хүний бүтээл, хадны сүг зураг, тамга тэмдгийн зүйл арвин ажээ. Эндэх аливаа дүрсийг хаднаа дүрслэн гаргахдаа нэлэнхүйд нь буюу их биеийн хүрээг цохиж, эсвэл хурц үзүүртэй зүйлээр сараачин дүрслэх хоёр үндсэн аргаар бүтээсэн байна. Эхний аргаар бүтээсэн зургуудын дотор буга, согоо, янгир зэрэг ан амьтан, адуу, тэмээ, нохой зэргийн мал адгуус, түүнчлэн нум сумаар зэвсэглэсэн хүмүүс ан гөрөө хийж буй байдал, адгуус амьтныг гаршуулан сургаж буй сэдэв байхаас гадна нум сум, байлдааны сүх, тэрэг, буйл, бурантаг, эртний олон овог аймгийн тамгыг дүрсэлсэн нь нэн их бөгөөд тэдгээрийн дотор онгин, сэрээ, хайрлага, чагтан болон янгир тамгад байна. Эдгээр дүрсүүдийн дотор буган хөшөөнд хийсвэрлэн дүрсэлдэгтэй адил шувуу мэт урт нарийн хошуутай, зоон дээрээ хушуурсан овгор бүхий дүүлэн нисч буй хэлбэртэй бугын дүрс, хоёр дугуйтай ганц урт аралтай тэрэгний дүрс зэрэг дүрсүүд байна.
     Харин хурц үзүүртэй зүйлээр сараачин зурсан нарийн зураасан зургуудын дотор хүн амьтан, зэр зэвсэг, орон байшин, тэрэг зэрэг зүйлс дүрслэгдсэн байдаг. Мөн энд шашин номын зан үйлийг тусгасан сэдвүүд ч байгаа нь XIII-XIX зууны үеийг хүртэлх цаг үед холбож болмоор ажээ. 
    Түүнчлэн цувраа Гурван Мандалын хоёрт нь эртний түрэгийн руни бичгийн дурсгал байгаа нь түрэгийн үед холбогдох дурсгал байгааг харуулна.
     НТӨ II мянган жилийн сүүлийн хагасаас НТӨ I мянган жилийн тэргүүн хагаст, мөн зарим дүрсүүд нь бүр дундад буюу XIII-XIX зууны үед холбогдож болохоор юм. (Д.Батсүх)