Хаан язгууртай, өндөр боловсролтой Генри Пү И хаан өргөмжлөгдөөд бодлогоор тодорхой томоохон зүйл бүтээгээгүй ч амьдралынхаа ихэнх хугацааг бусдын хяналтад тэргүүлэх албан тушаалд өнгөрүүлжээ.

1908 онд Айсингиоро Пү И-г 3 настай  хаан өргөмжилж төрийн хэргийг хааны эцэг Чунь ван шийдэж байв. Цагаагчин гахай жилийн хувьсгалаар Хятад орон Чингийн хаанд захирагдахаа больж, 1912 онд Юань Шикайн боловсруулсан хааныг огцруулах бичигт  бэлэвсэн их хатан Лунъюй гарын үсэг зуржээ. Пү И 18 нас хүртлээ Бээжин дэх хааны ордон Бор хотод амьдарчээ.

1924 онд Мин улсын хааны удмын Фөн Юйшян гэх жанжин Пү И-г Бор хотоос хөөжээ. Пү И-гийн гэр бүл Тяньжинь дахь Японы  мэдлийн газар луу нүүжээ.

1932 онд Пү И Японы байгуулсан Манж-го улсын Ерөнхий захирагч, 1934 оноос Манж-го улсын эзэн хаанд өргөмжлөгдөв. Түүний ордон Чанчүньд байв. Пү И-гийн дүү Пү же Японы эзэн хаан Хирохитогийн үеэл Хиро Сагатай гэрлэсэн ба Манж-гогийн хааны ор залгах ханхүүгээр нэр заагджээ. 1935-1945 онд Квантуны армийн Ясүнори Ёшиока Пү И-д туслаж, хянаж байжээ.

1945 онд Пү И Зөвлөлтийн улаан армид олзлогдож, Хабаровскт болсон шүүх хуралд гэрчээр оролцжээ. Тэрбээр Ляонин мужийн  шоронд 10 жил хоригдоод 1959 онд Мао Зэдунгийн өршөөлөөр суллагджээ. Дараа нь Бээжин дэх ургамлын хүрээлэн, улсын номын санд ажиллажээ.

Мао Зэдун, Жоу Энлай нарын урам өгснөөр Пү И “Миний амьдралын эхэн хагас” нэртэй өөрийн дурсамжаа бичжээ. Англи хэлээр орчуулагдахдаа “Эзэн хаанаас энгийн иргэн” хэмээх нэрээр хэвлэгджээ. 1964 оноос нас барах хүртлээ БНХАУ-ын  төрийн зөвлөлдөх зөвлөлийн гишүүн байжээ.

1967 онд Пү И 61 насандаа таалал төгсчээ. (С.Цолмон)