Бэрх хааныг нас барсны дараа түүний ах Батын ач хүү Мөнхтөмөр залгамжилж Алтан ордны улсын хаан ширээнд суув. Түүнийг төр барьж байх үед Алтан ордны улс хүчирхэгжиж газар нутгаа өргөтгөж чадсан байна. Мөнхтөмөр хаан Ил хаан Абагатай сөргөлдөж байсан ч Хубилай хааны шахалт, ятгалгаар Ил хаант улстай хэсэг хугацаанд тайван байдлыг сахиж чадсан төдийгүй, урьдын холбоотон Египетийн Мамлюктай ч эвслийн холбоогоо бэхжүүлж тансаг бэлэг бүхий элч нарыг харилцан илгээж байжээ.         

Алтан орд дахь улс захирах эрхийг нь батламжилсан зарлигийг Хубилай хаанаас хүлээн авсан Мөнхтөмөр эхэндээ Хубилай хаан, Аригбөх нарын хаан ширээний төлөөх  тэмцэлд оролцоогүй юм.

СырДарья мөрний хөндийд болсон Цагадай улсын хаан Боракийн эсрэг тулалдаанд Мөнхтөмөр хаан Өгэдэй хааны удмын Хайдуг дэмжиж оролцоод ялалт байгуулжээ. Үүний дараа 1269 оны хавар Талас голын хөндийд Өгэдэй, Цагадай удмын хан хөвгүүд болон ноёдууд хуран цуглаж Дундад Ази дахь монгол ноёдын анхны хуралдай хийжээ. Таласын чуулганы үр дүнд Мөнхтөмөр хаан Хайдугийн хамт  Мавераннахр нутгийн гуравны нэгийг өөрийн улсын эрхшээлд оруулжээ.

Мөнхтөмөр хаан болмогц худалдаа, эдийн засгийн асуудалд онцгой анхаарч мөнгө зоос цутгуулах, гадаадын худалдаачдад чөлөөт худалдаа эрхлэх зөвшөөрөл олгох, сүм хийдүүдийг алба татвараас чөлөөлөх зэрэг ажлыг юун түрүү хэрэгжүүлжээ.

1267 оноос Мөнхтөмөр өөрийн нэртэй зоосыг хуучин Крым, Булгар, Укек хотуудад дэлдүүлж байв. Булгар хотод дэлдүүлсэн Мөнхтөмөр хааны нэртэй, Бат хааны овгийн тамга бүхий  мөнгө, зэс зоос олдсон нь  ховор зоосны тоонд зүй ёсоор орж байна. 

1267 онд Мөнхтөмөр хаан Оросын Үнэн алдартны сүм хийдийг Алтан Ордод алба  өгөх үүргээс чөлөөлж зарлиг гаргаж байсан нь эхээрээ олджээ.

1269 онд Мөнхтөмөр хаан Ганзейн (Тверь,Германы) худалдаачдад харъяа нутгаараа татвар хураамжгүй нэвтрэх үнэмлэх бичиг шийтгэн олгох зарлигийг Тверийн их ван Ярослав Ярославичид буулгаж байжээ. Мөн Италийн Генуягийн худалдаачдад  Каффа хотод, Венецийн худалдаачдад Судак хотод чөлөөт худалдаа хийх эрх олгож байжээ. 1278 онд Венецийн анхны албан ёсны дипломат төлөөлөгч-консул Судакад хүрэлцэн ирж байв.

1274-1275 онд Мөнхтөмөр хаан Галиц Волыний вангуудад Литов руу довтлоход нь цэргийн тусламж үзүүлж байв. 1277 онд салан тусгаарлах оролдлого гаргасан Умард Кавказ руу дайлж оролдлогыг нь зогсоож байжээ. Мөнхтөмөр хаан 1280 (судрын чуулганд 1282 гэж бичдэг) онд өвчний улмаас залуугаараа нас баржээ. (С.Цолмон)