1271 онд эцэг Николо Поло, авга ах Маффео Поло нар 17 настай Марко Полог  авч дахин  Хубилай хаанд бараалхахад түүний сэргэлэн цовоо, авхаалжтайг ажсан  их  хаан түүнийг төрийн албандаа ажиллуулжээ. Марко Поло  1272-1289 оны хооронд 17 жил монголын төрд алба хаахдаа хааны бие төлөөлөгчөөр  олон улс оронд очиж байсан нь хожим гайхамшигтай тэмдэглэл бичүүлэх үндэс болсон юм. Түүнийг нутаг буцахад  Хубилай хаан түүнтэй хамт Ил хаанд Хөхчин гүнжээ илгээж байв. Нутагтаа буцаж ирэхэд нь Венец, Генуя хоёр хот улс хоорондоо дайтаж байснаас Марко Поло баригдан Генуя хотын шоронд хоригдсон ч 1299 онд суллагджээ. Тэрбээр гэрлэж 3 хүүхэдтэй болсон ба 1324 онд нас барсныг нь Италийн Сан Лоренцын сүмд оршуулжээ. 

Шоронд хоригдож байхдаа өрөөнийхөө Рустичелло гэгчид үзсэн харсан зүйлсийг хэлж бичүүлснээр Марко Пологийн аяллын тэмдэглэл хэмээх алдарт бүтээл буй болсон нь гайхан бишрэх, үл итгэхийн аль алиныг дагуулжээ. Энэхүү аяллын тэмдэглэл нь солиотой хүний тэмдэглэл хэмээн нэрлэгдэж байсан ч маш олон аялагчдын анхаарлыг дорно зүгт хандуулж, түүний мөрөөр аялж  Монголын их хаадтай уулзах хүсэл мөрөөдлийг өдөөж чадсан билээ. Газарзүйн их нээлт хийсэн Христофер Колумбын хөлөг онгоцон дээр Марко Пологийн аяны тэмдэглэл байсан гэдэг.

Марко Полог Хятадад очиж байгаагүй хэмээн зарим судлаачид үздэг ба  уг тэмдэглэлд мөнгө хэвлэж байгааг маш тодорхой дурдсан  атлаа ном хэвлэл, хятадын дүрс бичиг, цай, цайны ёслол, шаазан, эмэгтэй хүний хөлийг боон хатааж шувуун хөлтэй болгодог, мөн их цагаан хэрмийг дурдаагүй зэрэг нь үүний нотолгоо гэдэг. Нөгөө зарим нь Марко монгол хаад сурвалжтнуудын дунд ажиллаж амьдарч байсан учир хятадын хөл боож хатаах заншлыг мэдэж байх албагүй, мөн хятадын цагаан хэрэм нь тэр үед хүний анхаарал татахаар сүрлэг,урт байгаагүй, Мин улсын үед өнөөгийн төрхөө олсон учир түүнийг үгүйсгэх шалтгаан болохгүй гэдэг. 1982 онд хэвлэгдсэн Италийн мянгатын дэвсгэрт дээр Марко Пологийн хөрөг бий.

2011 оны 12 сард Улаанбаатар хотод, Чингисийн талбайн зүүн урд талд уран  барималч Б.Дэнзэнгийн урласан Марко Пологийн хөшөөг байрлуулжээ. 2014 оноос Холливудын уран бүтээлчид Марко Поло олон ангит кино хийж тэр кинонд нь тив дэлхийн алдартай жүжигчдийн зэрэгцээ монголын жүжигчид уригдан тоглож байгаа билээ. (С.Цолмон)