Далай лам Ёндонжамцыг монголын алтан ургийн удмын гэр бүлд мэндлэхэд түүнийг III Далай Лам Содномжамцын хойт дүр хэмээх мэдээ тархжээ.

Далай Лам нь Түвэд улсын буддын шашны шарын урсгалын тэргүүн  учир  түүнийг тодруулахдаа Түвэдийн 3 том хийд Галдан, Сэра, Брайбүн хийдийн дээд лам нарын зөвлөл хэлэлцэн, тусгайлан шалгаж нотлосны сүүлд сая эцэслэн шийдвэрлэдэг. Тиймээс тус гурван хийдээс шинжээч томилон Монгол улсад илгээжээ. Тэдгээр шинжээч нар Ёндонжамцыг олон зүйлээр нягтлан шинжиж буцаж очоод түүний хойд дүр мөн гэдгийг хүлээн зөвшөөрчээ. Түүнд Бүхнийг айлдагч Ёндонжамцбалсанбо монголчилбол “Эрдмийн далай сайн цог” хэмээх алдрыг хайрлажээ.

Түвдийн Галдан, Сэра, Брайбүн хийдээс албан ёсны төлөөлөгч томилон Монгол нутагт илгээн, Ёндонжамцыг Түвэд оронд залахаар аваачихад монгол цэргүүд хамгаалан дагалдаж явжээ. 

1602 онд Түвэдийн орноо Рэдан хийдэд хүрээд улмаар Брайбүн хийдэд залагджээ. Гэлүгпагийн дээд лам нарын хүсэлтээр Дашилхүмбо хийдийн ширээт лам IV Банчин Богд Лувсанчойжижалцан, Галдан хийдийн ширээт лам Гэндэн жалцан нарыг багшаар залж, тэднээс гэцэлийн санваар хүртжээ. Түүнийг IV Банчин Богд Лувсанчойжилын дэргэд Дашилхүмбо хийдэд шавилан суулгаж ном сургажээ.

1614 онд Ёндонжамцыг Брайбүн хийдийн арвангуравдугаар үеийн ширээт ламаар өргөмжилжээ. Гэвч тун удсангүй 1616 оны 12 сарын 15-ны өдөр IV Далай лам Ёндонжамц 28 насандаа Брайбүн хийдийн Галдан поврон хийдэд гэнэт таалал төгсчээ. (С.Цолмон)