1546 онд Банчин Сономдагва түүнийг 3 настайд нь Гэндэнжамц ламын хувилгаан хэмээн тодруулж, 7 настайд нь сахил хүртээж Содномжамц хэмээх болжээ.

Брайбүн хийдэд суралцан төгсөөд 1552 оноос Брайбүн хийдийнхээ хамба ламаар өргөмжлөгджээ. 1558 оноос Сэра хийдийг мөн тэргүүлэх болов. 1574 онд Далай ламын хийдийг үндэслэн байгуулжээ.

1578 онд Түмэдийн Алтан хан Түвэдийн шарын урсгалын лам Содномжамцыг урьж Хөх нуурын Цавчаал хэмээх газар түүнд зориулан барьсан Тэгчинчойнхорлин сүмд хүндэтгэн хүлээн авч уулзжээ. Алтан хан, Содномжамц ламд “Богд хамгийг айлдагч Очирдара далай лам” цол, тамга өргөв. Тэр үед  би гуравдугаар хувилсан дүр учир өмнөх хоёр дүрд Далай лам цолыг нэхэн олгож болох эсэхийг Алтан ханаас лавлахад зөвшөөрчээ. Тийнхүү Содномжамц  III Далай лам хэмээн өргөмжлөгдөв. Содномжамц лам Алтан хаанд “Их хүчит Чакраварди номун хан” цол хайрлажээ. Уулзалтын үеэр шашны хууль цааз хэлэлцэн баталжээ.           

1579 онд Алтан хаан нутагтаа буцаж ирж 1581 онд нас баржээ.Алтан хааныг залгамжилсан хүү Сэнгэдүүрэн нь эцгийнхээ хойтын буяныг үйлдүүлэхээр 1582 онд элч илгээж III Далай лам Содномжамцыг залжээ.

1586 онд тэрбээр Монгол нутагт хоёрдах удаагаа ирж Алтан ханы хойтын буяныг үйлдэж сүсэгтэн олонд ном айлджээ. Тэр үед Халхын Абтай сайн хан ирж бараалхахад “Очирой хаан” цол соёрхов. Yүнээс эхлэн Халхад буддын шашны шарын урсгал дэлгэрэхэд нөлөө үзүүлжээ. Тэрбээр Түмэн засагт хан болон их ноёдод залагдан шашин ном дэлгэрүүлэн явж байх тэр үед Сэнгэ дүүрэн хан 65 насандаа нас нөгчиж мөн түүний ёсыг гүйцэлдүүлжээ.

III Далай лам Содномжамцыг Хөх хотод байхад Халхын Автай сайн хан ирж бараалхаж Халхад шашин дэлгэрүүлэхээр бурхан, ном залжээ.

1588 онд Мин улсын хааны элч ирж Содномжамц ламтанд хааны заллага айлдаж түүнд Гүн дин да гүүшири цол өргөжээ.

III Далай лам Содномжамц заллагыг хүлээн авсан ч очиж амжилгүй мөн ондоо Монгол нутагт таалал төгсчээ. (С.Цолмон)