Манжийн төрөөс эхний үед Халхын баруун, зүүн гарын зөрчлийг хөндлөнгөөс ажиглаж байснаа, Ойрадын Галдан бошгот хааныг Халхын дотоод хэрэгт оролцох болсон тэр үеэс идэвхитэй оролцох болов. Тэд Галдан бошготыг оролцуулахгүйгээр Халхын дотоод хямралыг намжаах зорилго тавьжээ.

Манжийн Энх-Амгалан хаан Халх, Зүүнгарын эвдрэлцэлд түгших болсон шалтгаан нь монголын эв нэгдэлд санаа зовсонд бус харин хүчний харьцаа тэнцвэргүй байгааг олж харсанд байгаа юм. Галдан бошигт Далай ламын санал болгосноор Дорнод Туркестан руу дайтаж нэлээд хэмжээний газар нутгийг эрхшээлдээ оруулж, дайны олз үлэмж олж дээр нь алба татвар авах болжээ. Дайнд цэргийн зохион байгуулалт нь жигдэрч,нэгдмэл болсны дээр эдийн засгийн хүчин нь нэмэгдээд байгаа үед  Халх, Ойрад эвдрэлцвэл Халхын хант улс хүнд байдалд орж болзошгүй эрсдлийг тооцоолжээ.  

Тиймээс Манжийн Энх-Амгалан хаан санаачлага гарган V Далай ламаар дэмжүүлэн 1686 онд Заг Байдрагийн Хүрэн бэлчир гэдэг газар Халхын ноёдын чуулган хуралдуулжээ.

Чуулганы зорилго нь Халхын баруун, зүүн гарын ноёдын хооронд үүсээд байгаа зөрчлийг  намжааж эвлэрүүлэхэд чиглэгджээ. Тус чуулганд Далай ламын элч Галдан хийдийн ширээт гавж, Энх-Амгалан хааны элч эрхэлсэн сайд Арнай, Түшээт хан, Чахундорж, Өндөр гэгээн, Сэцэн хан Норов, Засагт хан Шар, Сайн ноёны Шамба засаг, Түшээт ханы дүү Сэдшир бэйл, Засагт ханы төрлийн тайж Саран ахай нарын зэрэг нэр нөлөө бүхий ноёд оролцжээ. Мөн чуулганд Галдан бошгот төлөөний ажиглагчаа оролцуулсан ба уг чуулганы ажиллагааг амжилтгүй болгохыг оролдож байв.

Чуулганыг V Далай ламын бие төлөөлөгч Галдан ширээт удирдан Манжийн хааны эв нэгдлийн тухай зарлигийг уншин сонсгож Түшээт хан, Засагт хан нарыг тэврэлдүүлэн эвлэрүүлж, найрамдлын тангараг тавиулжээ. Мөн чуулганаар хэлэлцсэн нэг асуудал бол Халх, Манж улс хамтран Оросын эсрэг тэмцэх явдал байв.

Хүрэн бэлчирийн чуулганы шийдвэр ёсоор Засагт хан, Түшээт ханаас албат харьяатаа нэхэмжлэхэд өгөөгүйгээр барахгүй, Түшээт хан цэрэглэн оржээ. Тулалдаанд Засагт хан Шар, Галдан бошготын дүү Доржжав нар амь үрэгдсэн нь Галдан бошготыг Халхад цэрэглэн ороход хүргэжээ. Халх, Ойрадын дайн дэгдсэнээс уг чуулганы шийдвэр амьдралд хэрэгжээгүйг харж болно. (С.Цолмон)