Ринчинбал хаан бол Хүслэн Минцзун хааны хоёрдугаар хөвгүүн болно. 1329 онд Хүслэн хаан нас нөгчиж түүний дүү Заяат Төвтөмөр хаан суурийг залгамжилжээ. Заяат хааны хатан Бодьшири, Ринчинбалын эх Бабушаг хөнөөж, Ринчинбал өнчин хоцорчээ. Заяат хаан Ринчинбалыг ихэд өрөвдөж, хайрладаг байсан учир түүнийг дүүгээ өргөмжилж нийслэл хотод дэргэдээ үлдээжээ.

Уг нь ах дүү хоёрын аман гэрээгээр бол Хүслэн хааны хоёр хөвгүүн Тогоонтөмөр, Ринчинбалын аль нэг нь хунтайж өргөмжлөгдөж хаан суурийг залгамжлах ёстой байсан юм. Гэвч Төвтөмөр Заяат хаан өөрийн хөвгүүн Алтандара-г хунтайж өргөмжилж, хаан сууринд залгамжлуулахаар болов. Гэвч Алтандара нь удалгүй нас нөгчжээ. 1332 оны 8-р сард Заяат хаан нас барахынхаа өмнө Хүслэн хааны ахмад хөвгүүн Тогоонтөмөрөөр суурийг залгамжлуулахыг гэрээсэлсэн байна. Гэтэл Заяат хааны хатан Бодьшири 7 настай Ринчинбалаар хаан суурийг залгамжлуулжээ. Ингээд Ринчинбал 1332 оны 10-р сарын 4-нд хаан сууринг залгамжилж, тус жилийн 11-р сарын 26-ны өдөр өвчнөөр нас нөгчжээ. 7 настай их хаан их сууринд 50 гаруй хоног сууж түүний үед онцгой тэмдэглэмээр үйл хэрэггүй байна. Хожим нь сүмийн нэрийг Нинцзун хэмээн өргөмжилөв. (А.Пунсаг)